Fraccion di AVP ta trece un amienda den Presupuesto 

ORANJESTAD – Den liña cu recomendacionan di institutonan internacional, como tambe organonan independiente di supervision y consehonan di institutonan constitucional, fraccion di partido AVP a trece un amienda unda lo avansa riba e cambio di impuesto directo pa impuesto indirecto. 

Entrante prome di juli 2015, e prima di AZV pa empleadonan lo baha di 2.6% pa 1.6%. Alaves e tarifa di e health tax lo ser aumenta cu 1%. E reduccion di prima lo percura pa mantene e poder di compra di nos ciudadanonan den liña cu e Programa di Gobernacion di Gabinete Mike Eman II, mientras cu e aumento di e tarifa di health tax lo garantisa un fluho di entrada mas estable pa e fondo di seguro medico AZV den liña di recomendacionan di Raad van Advies. E trasicion pa impuesto indirecto lo no afecta e salarionan neto. Tur hende, incluso e 1 miyon turista cu ta bishita Aruba, lo contribui na cubri gastonan di cuido medico pa pueblo. Di e forma aki hopi mas hende ta contribui na cubri e gastonan medico. Esaki ta fortalece e posicion di e fondo di seguro medico ye pakete cu cuido medico no ta cambia.

E ultimo rapport di IMF a indica cu economia di Aruba ta recuperando di e asina yama double-dip: e crisis mundial financiero y e cierre di e refineri. Gobierno a opta pa inverti den poder di compra, como tambe e calidad di biba durante e prome gobernacion. Na aña 2014 entradanan tabata den liña cu presupuesto, a introduci un limite na gastonan operacional di gobierno y a ehecuta reformanan di embergadura grandi riba tereno di gastonan di seguro medico, fondonan di pensioen y social den conhunto cu partnernan di Dialogo Social. IMF a indica cu e reduccion di deficit lo sigui na aña 2015, segun e raport di IMF.

E reduccion substancial di gasto aki lo wordo traduci den un reduccion di deficit di 15 miyon florin pa anja 2015. Pa anja 2015, Gobierno a atene su mes di cumpli cu un deficit di -3.7%. Cu e amienda presenta pa fraccion di AVP den Parlamento, lo reduci e deficit presupuestario un poco mas y ta sigura cu lo cumpli cu e normanan stipula den e meerjarenraming. Cu fin di mantene e poder di compra di nos ciudadanonan y protehe esanan mas vulnerable den nos comunidad, Gobierno a wordo instrui pa na momento di ehecuta e amienda aki, pa tene cuenta cu esnan cu ta cobra bijstand, cu ta gana un salario minimo, como tambe nos pensionadonan.

Expresionnan haci den e articulo aki no necesariamente ta refleha opinion di ArenaPoliti.co