Ta importante pa refresca memoria di pueblo cu declaracionan hasi door di mandatarionan y miembronan di fraccion di AVP. Den e articulo aki nos kier treci dilanti e declaracionan aki pero tambe enfatisa riba e racha di diferente belasting y cobransanan riba lomba di pueblo. "Nos NO lo introduci niun belasting nobo", esaki tawata palabranan di minister di Finansas expresa durante un entrevista hasi algun luna atras. No mester lubida tampoco palabranan di lider di fraccion AVP" Si cobra mitar di loke tin riba caya so caba e ta soluciona e problema di e deficit pa e benidero añanan y ta yega e punto di "balanced budget" lihe. E forma aki ta mas facil pa ehecuta ya cu no tin cu introduci niun belasting nobo. " Awe pueblo por constata cu pisca ta muri pa su boca.

Realidad ta cu e mandatarionan aki cu desacredita e famoso BBO na 2007 pa a caba cu e famia arubano nunca a elimine desde 2009 cu nan a sinta pasobra nan tawata sa cu si a hasi esaki e problema lo a bira mas grandi. Si bo ripara bon e belasting aki tawata unico problema cu AVP a gara y bai eleccion 2009 cune siendo cu su proposito tawata crea entrada pa pais pa tin un situacion financiero sostenibel. Awe nos tur ta mirando un gobierno cu mester guli su palabranan pasobra a keda cu e mesun structura di 2007 y na dos ocasion 1 december 2014 y dentro di poco 1 juli 2015 ta aumenta e BAZV cu 1% hasiendo esaki 3.5%. No mester lubida cu e cobransa aki a causa un consternacion ora cu a introducie y te dia di awe e ta un frustracion pasobra te ainda ta cobrando e na un forma cu ta perhudica e cuidadano.

Gabinete Eman no solamente ta contradeci su propio "principio di elimina bbo" pero literalmente a dicidi pa bombardea pueblo cu diferente belasting/cobransanan, algo cu por cierto nunca a yega di sosode den historia. Un di e belastingnan aki ta e exchange margin rate tax (belasting riba cambio di moneda stranhero). Na un promer instante esaki ta algo cu gobierno a bende cu ta banconan lo mester carga cu e costonan aki. Pero esaki tawata "too good to be true" pasobra despues asociacion di bankeronan a laga sa bon cla cu ta cobra e consumidor pasobra nan no por carge. E ta obvio si cu nunca e minister concerni y Gabinete Eman a hasi lo necesario pa evita esaki. Si banconan cu ta draai rond miyones no por carga e belasting aki, e consumidor si por carge?? E lista ta sigui cu un belasting/cobransa di 0.1-0.5% pendiente pa wordo introduci riba transaccionan bancario 3er kwartaal di e aña aki cual e suma genera lo bai den un Aruba investment fund. Remarcabel ta e hecho cu e consehonan duna riba e cobransa aki ta negativo. Durante reunionan publico miembronan di fraccion MEP a pone enfasis riba esaki pero no a logra haya e rapportnan for di minister. Tur esaki ta crea e impreshon cu kier core pa duna contesta y aclara pakiko ta sigui cu algo cu tin consehonan negativo riba dje. Pero manera semper e gobierno aki ta ciego y sordo. E costonan anual di projectonan ppp tin efectonan negativo riba e desaroyo presupuestario riba tanto termino mediano y largo. Ta di lamenta cu Gabinete Eman ta persisti asina tanto y cu ta pueblo un biaha mas lo ta e victima di e decision aki. Pa corona e obra gobierno a anuncia cu lo bai remplasa BBO y invoerechten cu un otro belasting cu lo bai riba lomba di e pueblo. E belasting nobo aki lo carga e nomber algemene bestedings belasting su tarifa lo ta entre 6%-8%.

Tur loke nos a menciona aki riba ta ehempelnan excluyendo e reforma fiscal di 2016 y otro medidanan (vuilheffing, eigenbijdrage azv, skoa etc) E conclusion cubo por saca for di e hechonan ariba ta mas cu obvio. Ta di lamenta si cu a goberna e pais aki na un forma asina iresponsabel creando aña tras di aña deficitnan di riba 340 miyon florin. Y awor ta pueblo ta esun cu tin cu guli manda abou pa scapa "pellejo" di e gobierno aki. Gabinete Eman nunca kier mustra di ta e ehempel door di corta vet den propio seno sino ta opta pa suta pueblo cu avalancha di medida!

Expresionnan haci den e articulo aki no necesariamente ta refleha opinion di ArenaPoliti.co