Forma di traha cu CFT a adopta di Europa no ta sirbi paisnan chikito 

E pensamento cu un regla, ley of procedura cu a wordo traha pa un pais, por wordo aplica sin mas den otro pais, ta completamente eroneo. Pa decadanan caba a keda demostra cu pa un plan, un maneho, un areglo of un principio wordo aplica y duna bon resultado, e mester tene cuenta cu circunstancianan structural y specifico di cada pais. E discucionnan na Europa rondo di e crisis financiero cu no tin fin di caba eynan, ta demostra esey. E reglanan cu a wordo desaroya y aplica den paisnan den parti nort di Europa, no ta aplicabel sin mas den otro paisnan mas den sur di Europa. E consecuencianan di esey a resulta den desempleo, bancarota, pobresa y problemanan social destructivo pa paisnan manera Spaña, Portugal, Grecia, Italia y hasta Francia. Pa nos aki na Aruba, Corsow, Boneiro, Sint Maarten, Saba y Sint Eustatius, e  tristo ta cu e mes un norma y maneho di Europa ta wordo aplica serca nos door di CFT. E consecuencia pa economia y bida na Corsow ya ta bisto y bon documenta. Bou precion di Hulanda, Aruba tambe ta na turno awor.

SIDS
Den mundo hopi gobierno y organisacion internacional a realisa cu e idea di aplica regla y normanan di paisnan grandi riba paisnan chikito y completamente diferente den tur sentido, no ta traha. Nacionnan Uni y su organisacionnan a adopta e pensamento cu pa cumpli cu principio y normanan di bon gobernacion, pa cumpli cu tratadonan internacional, cu normanan presupuestario y normanan riba otro tereno manera salubridad y combatimento di trafico di droga, mester crea normanan y forma di aplica maneho, cu ta cuadra cu e structuranan economico y social di paisnan chikito. Nacionnan Uni a desaroya e concepto di SMALL ISLAND DEVELOPING STATES (= islanan chikito den desaroyo). Aruba ta cay den e categoria aki. E concepto aki ta nifica cu mientras e paisnan chikito den desaroyo kier cumpli cu normanan di bon gobernacion, di un nivel di cuido di salud halto pa tur hende, cu normanan di husticia, di finansa sostenibel, etc., e paisnan chikito aki, pa motibo di nan structura economico limita y condicionnan social totalmente diferente, mester cana un caminda diferente pa yega na cumpli cu e normanan cu paisnan grandi y rico a traha.

CFT
E caso di Corsow a demostra kico aplicacion di normanan pa finansa publico cu CFT a adopta di Europa, ta haci cu un pais. Awor CFT ta bay aplica e mes un normanan aki na Aruba. Esaki pasobra Hulanda ta insisti pa impone su normanan, enbez di aplica norma y maneho cu Aruba mes ta traha. Ora Prome Minister Mike Eman a bisa Hulanda cu nos sa miho kico ta bon pa Aruba, e tabata kier men exactamente esey. Esta cu Aruba mes kier yega na presupuestonan balansa y na finansa publico sostenibel y cu su propio maneho di supervision cu normanan traha pa Aruba. Nos no kier a adopta e maneho traha na Europa pa paisnan grandi di Europa. Pasobra nos si ta tene cuenta cu e forsa y structura economico di nos pais. Nos si conoce e empresanan, e trahadornan y nan famia y kico ta posibel y kico no ta posibel pa yega na finansa publico balansa. E escohencia di Aruba den e ultimo cinco aña pa hiba un reforma di structura y institucionnan y un reforma di finansa publico den forma gradual, ta netamente pasobra nos sa con pa evita cu companianan kibra y hende perde trabao. Nos a wak kico a sosode na Corsow. Hulanda no kier a scucha. Oposicion na Aruba no kier a scucha pa motibonan oportunista. Awor e bataya contra destruccion di nos economia ta sigui aki mes. Awor nos ta bay wak ken ta kere cu por aplica normanan y maneho Europeo sin mas. Y ken ta kere cu nos propio escohencianan ta miho pa nos pais!

Expresionnan haci den e articulo aki no necesariamente ta refleha opinion di ArenaPoliti.co