Pueblo di Aruba, e pregunta aki ABO mester haci e minister Hulandes sr. Plasterk. Poco tempo atras tabata tin un rancamento di cabey y kibramento di blusa entre e gobierno Hulandes y esun di Aruba. E pleito ta si e KB (kleste baca) duna na gobierno di Aruba, lidera pa Michiel Godfried Eman tabata husto, si of no? E KB a bini for di Conseho di Minister di gobierno Hulandes pa motibo di “ondeugdelijk bestuur” (un maneho cu no ta sirbi pa nada) di parti di gobierno di Aruba. Consecuentemente, nan a haya otro si pa medio di un protocol firma y fecha 2 mei 2015. Obligatoriamente e 13 parlamentarionan di partido AVP mester a vota “VOOR” pa e Ley di supervision financiero CAFT dia 27 augustus ultimo. E propio CAFT ta declara den nan carta fecha 11 september 2015 na Minister di Finanzas, cu gobierno di Aruba supuestamente a realisa basta pa yuda drecha e situacion financiero, pero un biaha mas CAFT ta mira cu e no ta suficiente. Pues e situacion NO ta bon! E halvegare di Plasterk mester por ta na altura di cu CAFT a menciona cu gobierno di Aruba a haya un 4.2 como score di e self-assessment (nulmeting) conforme e recomendacion di CFT. Un test di Public Expenditure and Financial Accountability. Dicon CFT a manda gobierno di Aruba haci e test aki? No tin confiansa den e gobierno di AVP? Aki ta sigui e criterianan di e test: 1. E grado di confiansa den e  presupuesto. 2. Integridad y transparencia di e presupuesto. 3. Maneho confiabel durante e proceso di e presupuesto. 4. Exactitud y maneho interno debido di e ehecucion di e presupuesto. 5. Administracion, documentacion y reportahe corecto. 6. Supervision externo incluyendo un gerente corporativo.
Pueblo di Aruba, tur e puntonan ariba menciona ta puntonan di suma importancia pa un gobierno su maneho relaciona cu e presupuesto di e pais. E resultado di e test haci door di e gobierno di AVP, pa loke ta trata un asunto asina importante, a sali 4.2 como anotacion. Eigenlijk gobierno mester a bay cas pa e score tristo, malo, inapto, degradante y mediocre aki. Asina mes e halvegare di Plasterk ta gaba cu tur cos ta bon pasobra tin CAFT? Dicon sr. Plasterk no ta bisa kico CAFT ta relatando y si esakinan tambe ta bon? Como e cherry riba e bolo di idiotismo di Plasterk, mester menciona cu parlamentario Van Laar ta cuestiona e minister riba e echo cu e pueblo di Aruba no ta BEWUST cu e isla ta casi bancarota? Riba esaki e minister a reacciona manera un “cacho cu a sac’un puf” door di no por a contesta debidamente. Anto awor bo ta gaba e situacion financiero na Aruba? Foei foei foei! Ta na sr. Plasterk nan mester a bisa den parlamento Hulandes cu e ta un dikke vette nul. Pueblo tabata tin miedo di berdad cu Plasterk ta bin bisti cu carson of cu saya. Mirando su actuacion y declaracionnan na Aruba, enberdad esnan cu a bet cu ta cu saya e lo a bin bisti, a gana e bet aki. Pabien na e ganadornan!

Expresionnan haci den e articulo aki no necesariamente ta refleha opinion di ArenaPoliti.co