CAFT A DUNA GOBIERNO TE 31 JANUARI 2016 PA BIN CU ABB 

ORANJESTAD -- Fraccion di MEP a tuma nota cu CAFT  a duna gobierno di Aruba te 31 di januari 2016 pa presenta e presupuesto 2016 na Parlamento, cu e belasting nobo ABB of un alternativa similar.

Ta pesey nos ta pensa cu ta bon momento pa ripiti na AVP kiko ta e mihor solucion pa henter nos pais. E pueblo aki a sufri demasiado caba bou asina tanto medida. A hisa e grondbelasting, inkomstenbelasting, prima AZV, prima AOV, a cuminsa cobra pa piki sushi, a bin cu medida nobo di BAZV, a hisa e BBO, ta cobra pa parkeer den Playa, prijs coriente a subi drasticamente. Y mientras tur e medidanan aki a wordo introdusi, miles di mama y tata di famia a perde trabou. Esey ta ocasionando hopi problema den famia y problema den sociedad.

Pesey nos di fraccion di MEP kier propone un ALTERNATIVA, en bes di un ABB.

Stap 1: bai bek di 9 pa 7 minister. Esaki lo baha gastonan di gobierno mesora cu 17 miyon florin pa anja

Stap 2: baha cantidad di coordinador. Cu esaki nos no kiermeen manda tur coordinador cas. Pasobra si Mike Eman bai bek simplemente na e cantidad di su prome anja di gobernacion, e ta scapa 24 miyon florin. Y corda, e prome anja di gobernacion di AVP mes e cantidad di coordinadornan tabata mas cu double di e cantidad cu MEP tabata tin.

Stap 3: baha gastonan di biahamento, fiestamento, daggeldvergoeding, propaganda, abogado y consehero. Si baha esakinan cu 9 miyon florin so caba ta suficiente. Y asina mes gobierno ta keda cu hopi miyon cu nan por sigi gasta.

Stap1, 2, 3 ta suma 50 miyon florin, cu ta exactamente locual cu gobierno ta buscando cu e ABB. Pesey nos kier bolbe ripiti e solucion aki, en bes di medida. 
Por fabor, especialmente parlamentarionan di AVP, no pensa mes di aumenta e BBO of e BAZV atrobe, pasobra pueblo no por carga esey mas. Pueblo mester di un alivio, ban duna pueblo esaki!

Expresionnan haci den e articulo aki no necesariamente ta refleha opinion di ArenaPoliti.co