LABAMENTO DI PLACA, PLACA DEN CAMPANJA DI AVP, PAGA TICKET DI AVION Y HOTEL PA MINISTER, KIKO MAS? 

STA. CRUZ -- Durante e promer conferencia di prensa lider di MEP a elabora riba varios publicacion  den prensa internacional y local relaciona cu envolvimento di parti mandatarionan di Aruba cu Roberto Rincon cu a wordo deteni na merca pa motibo di labamento di placa y soborno. 

"Esaki ta ponemi pensa kiko e influencia por tawata di Rincon aki na Aruba pasobra den prensa tin acusacionnan hopi grave ta wordo lansa contra varios minister di Gabinete Mike Eman. Hasta nan a haya e nomber di "RINCON BOYS" nobo. No lubida, un persona cu ta wordo sospecha di soborno y labamento di placa, di a paga ticket y hotel pa ministernan bai Merca, ta kiko mas Mike Eman y su gobierno ta warda pa reacciona? Dicon e silencio hermetico di parti ministernan di Aruba? 

Mike Eman y su ministernan no por keda keto mas. Tin un dicho ta bisa " wie zwijgt stemt toe" y e miedo di e ministernan di Gabinete Mike Eman ta confirma e dudanan, y talbes nan ta keda keto pasobra nan tin hopi mas di sconde. 

Pueblo di Aruba ta cansa di e tipo di escandalonan aki di politiconan di Mike Eman. Promer tawata caso di strawberrygate di Otmar Oduber den cual te dia di awe niun strawberry a wordo planta, placa a somenta, e persona ta deteni. Despues e envolvimento di MikeEman cu Kiko Gomez cu tambe a wordo deteni. Awor ta e caso di Robert Rincon cu Mike Eman, Mike de Mesa, y cantidad di minister mas. Ta kiko mas lo bai tuma lugar poniendo Aruba su nomber den lus negativo? 

E realidad ta cu Gobierno no por keda keto mas y keda sin reacciona, sino bo ta aceptando tur cos. Mi ta reta Mike Eman pa bin na pueblo un splicacion!", tawata palabranan di sra. Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co