Nos a tuma nota cu Minister Eman kier convence Pueblo cu su gobierno riba propio forsa a sa di soluciona e crisis cu ela haya nos Pais aden na 2009. Segun e mandatario, Gabinete Eman a inverti den Pueblo pa asina supera e crisis prome cu Pueblo mes pidi pa ayudo. Pero awe e Pueblo ta mas mal para cu na 2009. Ta parce cu Minister Eman no kier realisa cu su maneho financiero a faya y cu ela perhudica e Pueblo enves di a yuda e Pueblo.

A fia mas di 1000 miyon florin
Segun Minister Eman su gobierno a haci lo imposibel posibel na Aruba sin ningun yudansa externo, sin ningun placa fia for di Hulanda, di IMF of World Bank. Pero ta con nos mester yama e mas di 1000 miyon florin cu Gabinete Eman a presta riba mercado internacional di entre otro Credit Suisse? Ta con bin cu e debe cu nos Pais a acomula den 23 aña a wordo REDOBLA den apenas 4 aña di tempo? Acaso nos no tin cu paga e MEGADEBE aki? E ta incomprondibel con Minister Eman por sinta manipula e mente di e Pueblo aki bisando cu ta riba propio forsa su gobierno a saca nos Pais for di crisis, siendo cu tur hende por wak cu ta un debe monstruoso ela crea hincando e Pueblo aki den un crisis aun mas grandi.

Deficit no ta crea prosperidad
E ta remarcabel pa mira Minister Eman bisa cu den e presupuestonan di 2013, 2014, 2015 y 2016 nos a core deficit cu gobierno a financia pa crea prosperidad nobo pa Aruba. Cu tur respet, ta con Minister Eman ta kere cu un MEGADEBE por crea prosperidad pa un Pueblo? Sigur si nos tene cuenta cu locual Banco Central y CFT ta indica cu di tur e placa cu a wordo fia menos di 1% a bay den inversion na bienestar di Pueblo. E uniconan cu a conoce prosperidad na man di Gabinete Eman ta e friends, family y sponsers di AVP cu a drecha nan situacion economico cu tur clase di benoeming, contract, negoshi, placa di huur y dispensacion di belasting. E Pueblo engeneral mes a bay atras cu tur sorto di medida cu Gabinete Eman a introduci pa yega na placa pa por sigi malgasta na cosnan cu no tin necesidad.

Minister Eman mester realisa cu ela faya
Gobernacion ta algo serio. No por sinta inventa cu pensamentonan economico y bay haci e locura di bay fia pa loco, bira gasta e placa na cosnan cu no tin prioridad y cu no ta crece e economia di nos Pais. Minister Eman mester realisa cu su plan pa drecha finanzas publico a faya y cu no por keda perhudica nos Pueblo cu tanto mentira y manipulacion. Tampoco por falta e Pueblo aki respet bisando cu como Minister President e ta orguyoso di e debe haci. Ta ora pa Minister Eman tuma honor na su mes y bandona gobernacion ya cu ela faya y mas e keda na mando, mas elo perhudica e Pueblo aki.

11 februari 2016

Expresionnan haci den e articulo aki no necesariamente ta refleha opinion di ArenaPoliti.co