No ta normal mas e manera cu Minister Eman ta bin ta manipula y trece ponencianan dilanti cu no ta cuadra cu realidad. Sigur e ultimo dianan aki Minister Eman a scirbi un cantidad di articulo di prensa den cual e mandatario ta papia riba e finanzas publico di nos Pais den cual e mandatario ta haci un wega peligroso di malinforma nos Pueblo. Na nos opinion un Minister President di un Pais no por presta su mes pa tanto manipulacion di e berdad financiero di nos Pais. Minister Eman mester tin berguensa di ta goberna a base di mentira.

Enves di jumpstart a stanca e economia
Minister Eman ta declara cu ela scohe pa jumpstart e economia di nos Pais siendo cu tur hende sa cu e economia di nos Pais a stanca na man di Gabinete Eman. Mira por ehempel e encuestanan haci pa Banco Central cu ta mustra cu e confiansa di comercio dia pa dia ta bira menos debi cu Gabinete Eman no ta brindando e stabilidad den gobernacion y tampoco ta inspira e confiansa necesario cu ta locual ta incentiva e comerciante pa haci inversion pa lora e economia di nos Pais. Pesey pa Minister Eman bisa cu ela jumpstart e economia di nos Pais ta un mentira flagrante.

Deficit nunca antes bisto
Minister Eman ta bisa cu prome cu Gabinete Eman tabata existi deficit structural di casi 9.4%. Nos ta invita Pueblo pasa den e Annual Statistical Digests di Banco Central y mira e cifranan di Gabinete Oduber versus Gabinete Eman y saca propio conclucion kiko ta deficit structural. Ta bon tambe pa corda cu Presidente di Banco Central den e cuenta anual di 2011 a remarca riba pagina 4 [añadi na cabamento di e articulo] cu Aruba ta conociendo cifra di deficit y debe nunca antes bisto. Pesey ora Minister Eman papia di deficit structural prome cu su gobernacion, e mandatario simplemente no ta papia e berdad.

Maneho financiero iresponsabel
Cu Minister Eman ta declara cu for di 2010 tin un maneho financiero responsabel na nos Pais ta un locura total. E plannan introduci desde 2010, e cuadro financiero pa baha deficit tur aña cu 75 miyon, e acuerdo di balanced budget y e normanan di CAFT, ningun plan a resulta ya cu Minister Eman nunca tabata tin e boluntad pa drecha e finanzas publico. Pruebanan palpabel di esaki ta e cambio di tres minister encarga cu finanzas, e KB y e supervicion financiero di CAFT. Si e maneho financiero tabata stabiel y sostenibel no lo tabata tin mester di bay bou supervicion financiero. Ta ora cu bo maneho financiero ta iresponsabel nan ta pone bo gobierno bou curatela.

Reforma no tabata pa mihor
E reformanan cu Minister Eman a introduci tabata netamente pa baha e obligacionnan di gobierno pa asina resta mas fondo publico pa gasta na cosnan cu no tin prioridad. Asina nos por lesa con Algemene Rekenkamer Aruba den e rapport riba Cuenta Anual 2014 di Pais Aruba ta remarca riba pagina 19 y 20 cu e reforma di APFA no a yuda pa drecha e finanzas publico. Ta e ambtenaar a wordo corta den su derecho pa Minister Eman keda cu mas placa pa derocha. Pues pa Minister Eman bin gaba cu ela garantiza e fondonan ta otro mentira.



A surpasa 100% di nos GDP caba
Por ultimo mester remarca cu Minister Eman parce di no a lesa of a compronde kiko IMF a scirbi den e rapport cu Minister De Meza y su mesun persona kier a tene scondi prome cu eleccion na 2013. Den e rapport aki IMF a pone bon cla cu si mester tene na consideracion tur e debe cu ta wordo haci pa e proyectonan Private Public Partnership (PPP) anto e ora ey nos ta yega surpasa 105% di nos GDP. Pesey no ta maneho di otro, pero ta e propio mal maneho di Minister Eman tin nos Pais den e decadencia cu nos ta aden. Minister Eman sinceramente mester tin berguensa di ta gobernando a base di tanto mentira.

Expresionnan haci den e articulo aki no necesariamente ta refleha opinion di ArenaPoliti.co