Perspectiva Independiente without background 001

Xiomara Ruiz-Maduro: Firma di presupuesto 2014 no ta marca final na e disputa entre Gabinete Eman y Hulanda

Xiomara03E siman aki ta habri cu e noticia cu Gobernador ta firma Presupuesto 2014. Pero e firma di e presupuesto aki no ta marca final na e disputa entre Gabinete Eman y Hulanda ya cu ainda falta mas medida pa drecha e desaster di AVP y e supervicion permanente di CFT ta wordo regla.

Gobernador a cumpli cu locual e KB ta stipula, esta no firma e presupuesto 2014 tanten cu CFT no investiga y saca afor e berdad di nos finanzas publico, y tanten cu Gabinete Eman no haci e cambionan necesario manera CFT ta recomenda. E rapport di CFT a keda presenta y Gabinete Eman a haci cambio na e presupuesto y Parlamento a bay de acuerdo cu e cambionan. Despues cu CFT a tira bista riba e cambionan Gobernador a tuma su decicion di firma e presupuesto 2014. Cu esaki e KB ta keda cumpli cune y ta keda termina. Locual si no ta keda termina ta e realidad cu e rapport di CFT ta bisa nos, e medidanan cu mester wordo tuma pa por drecha e desaster cu Gabinete Eman a haci na nos finanzas publico y e supervicion financiero di CFT cu ta wordo regla pa evita mas desaster.

E danio cu Gabinete Eman a ocaciona na nos finanzas publico ta enorme y manera cu CFT a indica lo dura te aña 2040 pa nos por yega na un finanzas publico manehabel na e nivel cu Gabinete Oduber a lage na 2009. Como cu 2014 ya ta termina, un cantidad di medida no por a wordo tuma ainda y lo mester wordo incorpora den e presupuestonan di 2015 te cu 2017. Hulanda no tin confiansa mas den e palabra di Minister Eman y pesey na februari 2014 a pone como condicion caba cu CFT mester keda haci supervicion financiero pa evita cu Gabinete Eman ta bolbe sconde informacion of pinta e situacion mas bunita cu e ta y ta ocaciona mas desaster cu e finanzas publico di nos Pais.

Remarcabel ta cu Gabinete Eman a indica caba cu lo introduci un Fiscal Council na Aruba pa por haci e supervicion financiero necesario y cu esaki lo wordo sosteni pa e secretariado di CFT. Pero ta bisto cu Hulanda no ta di acuerdo cu esaki pasobra nan no ta considera e Fiscal Council como un organo cu lo por traha na un manera independiente. Ademas sr Bakker di CFT mes a indica cu CFT tin su manera di traha y no ta asina cu nan secretariado por asisti e Fiscal Council di Aruba asi no mas. Banda di esaki mester tene na cuenta cu CFT a haci e trabou pa Gobernador a base di e KB y despues cu e KB termina no lo tin base pa por traha na Aruba. Pa nan por haci un trabou pa Aruba esaki lo mester keda hustifica den un Ley di Reino den cual Aruba y Hulanda ta bay di acuerdo cune, y aki ta na unda cu Gabinete Eman mester bay acepta cu nan a entrega e autonomia financiero di nos Pais debi na nan maneho iresponsabel di nos finanzas publico. E pregunta ta si Minister Eman lo acepta esaki manera ela acepta e KB.

Pesey mirando kiko tur ainda mester pasa ta bira bisto cu firma di presupuesto 2014 no ta marca final na e disputa entre Hulanda cu Gabinete Eman. Pronto por spera un otro disputa y kizas un otro KB.

3 december 2014

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.