Despues cu e presupuesto adapta di 2014 a wordo trata den parlamento y aproba door di fraccion di AVP esaki a sigui su rumbo pa gobernador y tambe na CFT pa e por a duna su evaluacion. Conforme e KB impone dia 11 juli 2014 CFT ta esun encarga pa tira un bista riba e nivel di realidad di e desaroyo y contenido di calculacionnan multi-annual esta e presupuestonan pa e añanan 2015-2018.

No a cumpli cu "balanced budget akkoord"
Den e carta dirigi na gobernador e instituto CFT ta indica cu e medidanan implementa den e presupuesto 2014 lo no ta suficiente pa por logra cumpli cu proposito di e acuerdo di Gabinete Eman jama “Balanced budget akkoord” cual nifica cu e Gabinete no ta manteniendo su mes na su mesun limitenan di por ehempel gasto. Ademas di esaki CFT ta trece dilanti cu e medidanan no ta incorpora den un forma completo den e presupuesto pa por yega serca di tur e recomendacionan hasi door di CFT na september 2014. Den otro palabra a adapta e presupuesto si , pero parcialmente. Finalmente e deficit financier enbes di 4.9% a resulta di ta 9.3% y nos debe nacional 80.7%di nos GDP. Basa riba e cambionan hasi a pone cu e presupuesto su nivel realistico a aumenta y ta door di esaki a recomenda pa firma. Enfasis mester wordo poni si riba e hecho cu e aña ta den caba y automaticamente bo tin un bista mas cla di e cifranan.

Situacion financiero ta keda precario
Aunke cu pa gobierno su “pesadiya” di presupuesto 2014 a termina esaki no ta kita nada di e realidad financiero di nos pais. E investigacion di CFT a desenmascara Gabinete Eman pe solo hecho cu e presupuesto 2014 a wordo adapta pa esaki ta poco mas realistico cu esun presenta promer na Juni 2014. Awor mas cuidadano a haya sa y ta conciente di e berdad cu e finansas publico di nos pais lo por ta sostenibel atrobe te na 2040. Si no ta pa e investigacion e berdad di e disaster financiero crea door di Gabinete Eman den apenas 5 aña lo no a sali na cla y wordo confirma!

Expresionnan haci den e articulo aki no necesariamente ta refleha opinion di ArenaPoliti.co