Perspectiva Independiente without background 001

Rene Herdé (AVP): E realidad ta contradeci tur storia y mentira di oposicion

Herde03
E discucion riba finansa publico di Aruba cu a domina prensa y discucionnan pa ultimo tres aña ta parse di a bira menos. E realidad ta cu e discucion tabata wordo hiba riba analysisnan di cifra so y prognosticonan prematuro y incompleto. Aunke e proceso di reforma financiero y en especial di e aparato di gobierno ta leu di ta cla, e ultimo analysisnan di expertonan pafo di politica ta duna un bista riba e futuro. No storianan cu ta wordo ripiti te cu hende ta cuminsa kere den nan. Pero analysis di kico a y ta sosode y unda esaki ta bay hiba nos den e benidero añanan. E analysisnan rational aki, traha sin agenda of meta scondi, ta duna un bista mas realistico y mas confiabel di unda nos ta y unda nos ta bay yega.

ANALYSIS OBJETIVO
Dos siman pasa CFT/CAFT bou direccion di expertonan di Hulanda a presenta nan relato anual di 2015 y a duna comentario riba e ultimo resultadonan di e maneho financiero y economico di Aruba. Specificamente a comenta e echo cu e maneho financiero di gobierno a percura pa reduci e deficit na un nivel considerabelmente mas abou cu a palabra pa e aña 2015. A palabra cu e lo a baha te na 3.7%. E resultado tabata cu ela baha te na 2%. CFT/CAFT a expresa nan pleno confiansa den e maneho financiero di gobierno di Aruba. Esaki ta e mes un maneho cu a palabra cu pueblo den eleccion di 2013. E resultadonan a dura pa sali na cla, pero awor cu nan a apenas cuminsa sali (-ainda falta-) ya por haya un miho bista di kico e futuro lo ta.
Siman pasa e instituto FITCH RATINGS di Merca a presenta su analysis di e condicion di finansa y economia di Aruba. Den su relato Fitch Ratings ta bisa cu e maneho ta duna e resultado cu a fiha como meta y cu a base di esey ta mantene e status di Aruba na "BBB" y e prognostico pa futuro cercano como "positivo". Un evaluacion cu ta hopi bon pa in pais chikito manera Aruba, cu un economia chikito y cu a caba di sali di un crisis financiero-economico mas pisa cu resto di mundo. (Corda e "double digit" y "double dip" cu cua a describi e crisis na Aruba di añanan 2008-2011)
Kico tur esaki kier men? E kier men cu e maneho financiero economico di gobierno (di AVP) ta bay percura pa yega e punto di "balanced budget" manera a palabra, pa e ora cuminsa paga e debenan cu a acumula for di 1986, den forma accelera. Anto esey ta riba propio forsa. Lo ta hopi bon si gobierno Hulandes duna Aruba e mes un facilidad cu a duna Corsow y Sint Maarten pa refinancia debenan na un interes hopi mas abou (1.5% enbez di 5-6%). Pero si nan no coopera, nos lo haci'e riba propio forsa. E prognostico financiero aki tampoco a tene cuenta cu e posibel re-apertura di e refineria. Si esey concretisa e aña aki, e lo tin impacto riba economia, mercado laboral y finansa publico e aña aki y e benidero añanan. Esaki ta e realidad di awe y pa e añanan cu ta bin! Esaki ta contradeci tur e storianan di bancarota, desaster financiero, medida, malgastamento di placa y mas di e storianan cu a usa pa critica e maneho den ultimo añanan. Awe e realidad ta papia palabra cla! E futuro di Aruba y su hendenan ta riba bon caminda pa nos tur!

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.