Perspectiva Independiente without background 001

Booshi Wever (UPP): Dicon e gobierno di Aruba a acepta oficialmente curatela financiero Hulandes??

Booshi02Dia 11 di juli 2014 lo drenta historia politico di Aruba como un dia infame y scur na unda prome-minister Mike E. a dicidi di un forma sumamente infantil pone cara di henter nos pueblo na berguensa door di cuminza cu un welga di hamber. E unico meta di e accion repudiabel aki tawata pa tira santo den wowo di su 33 y pico mil votador cu e y su partido a laga completamente na caya, firmando e protocol di dia 3 di juli 2014 na unda a entrega autonomia financiero di pais Aruba y a permiti e secretariado di Cft bin haci un investigacion imparcial di e presupuesto ficticio entrega door di ex-minister J.D. Irausquin.

Lamentablemente e acto bergonsoso di entrega di nos autonomia no a caba aki, pasobra Mike E. a dicidi atrobe di sigui mancha e bon reputacion di nos Pais. Mike E. a wordo “op het matje geroepen“ pa acudi di inmediato e siman aki pa papia riba e condicionnan cu e gobierno hulandes a bin ta “propone” na e gobierno di Aruba pa loke ta trata supervision di e presupuesto 2015 y posiblemente tambe control total door di Cft di e presupuestonan di e proximo añanan, mescos cu loke ta tuma lugar na St. Maarten y Corsow.

Permitimi recorda e pueblo Arubiano cu na 10-10-10 Hulanda a yega na un acuerdo cu e gobiernonan di St. Maarten y Corsow pa paga parti di e debe di ambos pais y presta nan placa na un interes hopi atractivo (Aruba a fia parti di e placa aki for di Corsow e aña aki pagando un interes un tiki mas halto), pero tur esaki pa medio di un ley (“consensusrijkswetten”). Den e caso di Aruba nada di esaki no a tuma lugar. Dia 3 di juli 2014 Mike E. a sucumbi bou di presion hulandes y a acepta tur condicion presenta door di gobierno di Reino.

E pregunta cardinal pa ami ta e motibo dicon diripiente Mike E. a tuma e decision di “kita sunu” y “cay completamente na rudia” pa e presion hulandes door di acepta supervision di Cft sin mas. Na Spaño tin un dicho cu ta bastante aplicabel pa e situacion actual: “aquí hay gato encerrado”!

Mi no por keda sin haña e impresion cu e gobierno hulandes tin bastante informacion y sospecho di posibel actonan coruptivo cu ta y a tuma lugar na Aruba y na unda posiblemente diferente minister den e gabinete di Mike E. lo ta involvi. Si esaki ta cuadra cu berdad anto aki un wega sumamente maligno y contra tur regla di bon gobernacion ta wordo hunga door di e gobierno hulandes. Si ta permiti corupcion pa simplemente por haña e poder total di nos Isla, sin cu esaki a costa Hulanda un cen preto, anto en berdad democracia a haña un “low blow” cu lo perhudica pa hopi tempo e confiansa di nos pueblo den un gobernacion corecto na Aruba y tambe na Hulanda.

Ami lo acerca politiconan hulandes y parlamentarionan pa haci preguntanan alcaso y verifica si esaki lo por ta cuadra cu berdad.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 10, 2014

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.