Lider di MEP Evelyn Wever-Croes ta hopi satisfecho cu e ley pa habri apelacion den caso di belasting a keda aproba den Parlamento.
"Desde cu mi a cuminsa traha 25 anja pasa mi a haya un concepto di e ley aki pa duna comentario, y awe 25 anja despues, mi ta hopi satisfecho cu nos ta asina leew. E ley no ta cambia mucho den e procedura actual cu si bo no ta di acuerdo cu un cobransa, bo ta manda bo carta di obheccion na Inspector. Esey ta e bezwaar. Si bo no ta di acuerdo cu e decision ey bo por cuminsa un caso na Corte na Aruba dentro di dos luna di e fecha di e decision di Inspector. Y si despues di esey ainda bo no ta di acuerdo, bo por apela e decision dentro di dos luna di e decision na Corte di apelacion.
Importante ta cu desde prome di januari no tin cu manda carta di apelacion mas na Curacao pero na Aruba mes.
E unico punto cu tabata tin nos preocupa tabata cu actualmente bo mester paga un seyo di 5 florin pa cuminsa e caso, y gobierno kier a aumente pa 50 florin pa e prome instancia y 300 florin den apelacion. Un aumento hopi drastico. Sinembargo mi a papia cu Minister Bermudez cu esaki ta crea un barera mucho halto pa esnan cu kier busca nan derecho y mi a pidi sr Bermudez pa reconsidera. Den casonan administrativo similar di LAR e sumanan ta 25 florin pa prome intancia y 75 florin den apelacion. Nos a prepara un amienda tambe pa cambia e ley, pero Minister mes a entrega un nota di cambio y a baha e sumanan te 25 florin y 75 florin manera nos fraccion a pidi.
Masha poco biaha bo ta haya un Minister cu ta habri pa scucha prepcupacionnan di oposicion, y pesey mi a gradisi Minister Bermudez. Tambe mi a gradisi e expertonan di Departamento di impuesto y di Legislacion cu tin hopi anja ta traha riba e ley aki. Tambe esnan di corte pasobra cu esaki Corte di Aruba a haya un responsabilidad grandi aserca y awor nos mester demostra cu nos por hasie. Mi a segura nan cu nan por conta riba sosten di fraccion di MEP den tur cos cu nan tin mester pa ehecuta e tareanan aki.
Pabien Aruba pasobra cu esaki a crea mas proteccion pa cuidadanonan, especialmente awor cu Gobierno tin pensa di bai cobra belasting na forma mas intensivo ta bon pa tin mas proteccion tambe.

Expresionnan haci den e articulo aki no necesariamente ta refleha opinion di ArenaPoliti.co