Ora bo ta biba den Emanlandia ta bira dificil pa distingi kiko ta fiction y kiko ta e realidad. Ta bisto cu e lider di Fraccion di AVP no por distingi mas e berdad cu rapportnan di Fitch ratings y CFT ta bisa di nos situacion financiero, for di e storianan y mentira cu Minister Eman ta manipula nos Pueblo cune dia aden dia afor. Pasobra contrario na locual e parlamentario kier sugeri, ni Fitch, ni CFT a expresa confiansa den e maneho financiero di Gabinete Eman.

Fitch
Ta parce manera cu AVP y su exponentenan a lubida cu Fitch a degrada e rating di Aruba na 2014 y ta como cu nos Pais ta bou di supervicion financiero di Hulanda, ta pesey Gabinete Eman no a logra degrada nos Pais te na e nivel di junk bonds na unda cu inversionista ta keda lew debi cu e Pais ta wordo considera di no ta serio. Desde 2014 pa awor mucho no a cambia. Te ainda niun hende sa dicon Banco Central ta rapporta un deficit dobbel mas grandi cu Gabinete Eman ta publica pa 2015. Banda di esaki nos por mira den e rapport di Fitch cu Gabinete Eman a yena nan wowo bisando cu lo introduci un transfer tax riba tur transaccion na banco y lo introduci e belasting nobo ABB cu mane premira lo ta na 6 of 8%. Ta medida fuerte esakinan ta pa Pueblo. Mester remarca cu Fitch tambe ta mustra cu economia na nos Pais ta stanca, inversion priva a keda atras y esaki ta pone cu Aruba ta mas mal para compara cu e otro paisnan cu tin un score BBB negativo. Pero Fitch a bolbe corda nos cu ta como cu nos ta miembro di Reino Hulandes y Hulanda ta conta cu un score di AAA plus y banda di esaki nos Pais tin un bon record di ta cumpli cu su deber –danki na Gabinete Oduber su maneho financiero- ta pesey Aruba a mantene e score BBB negativo. Pues locual cu Fitch ta mustra aki no ta nada pa sinta gaba cune y pesey logicamente na NINGUN caminda nan ta elogia of bisa cu nan tin confiansa pleno den e maneho financiero di Gabinete Eman.

CFT
Den su Cuenta Anual pa 2015, CFT tampoco no ta elogia e Gobierno di Eman. Alcontrario, nan ta mustra riba e hecho cu Aruba tin e inflacion y e debe mas halto den Reino cu ta yega 82% caba. CFT ta indica cu Aruba su gastonan di interes ta core den 16% siendo cu Paisnan cu score BBB negativo mescos cu nos nan debe ta rond di 40%. Nan tambe ta splica cu nos economia ta stanca, cu entrada di turismo y inversion di sector priva, net locual mester crece nos economia, a keda atras. Nan ta mustra riba e falta di confiansa den stabilidad fiscal na Aruba ya cu ningun hende sa si lo subi BBO, si ta bin transfer tax, si ta bin cu BBO etc etc. Claro si bo Pais no tin un Minister Presidente pa goberne, bo ta haya e falta di e confiansa cu esaki mester transmeti. CFT a mustra tambe cu Gabinete Eman no a bin cu solucion structural, sino a scohe pa cumpli cu norma door di bin cu cosnan incidental manera, introduci e belasting VAS na december pa cobra winstbelasting adelanta y banda di esaki haci e triki financiero di libra Gobierno di paga 60 miyon na e fondo di SVB. Mas cu claro, CFT a mustra gobierno riba e gastonan cu ta colga riba Pueblo su cabes pa paga pa e proyectonan PPP, pa cual CFT proximamente lo traha un rapport apart pa mustra riba e consecuencia cu esaki lo tin pa nos cartera.

Populismo bashi den Emanlandia
Pues pasando den e informacion aki ta bira bisto cu ni Fitch, ni CFT a expresa nan confiansa den e maneho financiero di Gabinete Eman. Esun cu ainda kier bisa esaki ta simplemente practica e populismo bashi cu a para bira normal den Emanlandia.

12 mei 2016

Expresionnan haci den e articulo aki no necesariamente ta refleha opinion di ArenaPoliti.co