STA CRUZ – Lider di MEP Evelyn Wever-Croes a reacciona satisfecho cu e resultado di Standard & Poors. Lider di MEP y parlamentario Xiomara Ruiz-Maduro a reuni cu S&P dia 10 di mei ultimo, y por a nota cu e posibilidad di reapertura di e refineria tabata hunga un papel grandi pa S&P y esey a resulta awor den un cambio positivo den e perspectiva pa futuro. Lamentablemente pa loke ta trata e rating mes, S&P a mantene e downgrade e maneho di gabinete Mike Eman na BBB+/A-2, un downgrade cu nan a duna Aruba desde 14 juni 2013.

RATING DI PAIS ARUBA 
Dia cu MEP a sali di gobierno a laga e rating na A-. Dia 14 di juni 2013 S&P lamentablemente a downgrade Aruba, na BBB+/A-2. Ya Aruba no tabata pertenese mas na e categoria A debi na e mal maneho di gabinete Mike Eman, cu casi a manda nos pais bancarota. Y ainda nos no por lanta cabes di e downgrade aki. S&P a base di e maneho financiero y economico fracasa di gabinete Mike Eman a mantene Aruba den e categoria B.

PERSPECTIVA POSITIVO DANKI NA E REFINERIA 
Pa loke ta e perspectiva den futuro si S&P ta pensa cu esaki ta mas positivo, pasobra tin un chance grandi cu e refineria ta bai habri bek. Esaki tin nos satisfecho. Y no mester lubida cu e posibilidad di reapertura ta danki na insistencia di MEP, y especialmente danki na e gestionnan di Glenbert Croes na Venezuela. Pasobra gobierno di AVP ya tabata cla pa desmantela. Nan a anuncia caba ki dia lo desmantela. Na februari 2015 cosnan cuminsa cambia na momento cu MEP a tene e accion ORA CERO na porta di e refineria, y mes momento a manda informa Valero pa STOP demantelacion. Nos a cuminsa e campanja, NOS KIER ALTERNATIVA Y NO MEDIDA. Nos mester a bringa cu oponentenan y prensa cumpra cu no kier a mira reapertura di e refineria. Nan a chuercha di nos, pero awe nos ta mira cu ta danki na e insistencia ey, nos por piki e prome fruto, un mehoracion di e rating di S&P.

VERSION DI GOBIERNO 
Ta cu hopi asombro nos a tuma nota di e version di gobierno. Tanto prome minister Mike Eman como lider di fraccion Baba Herde ta menciona cu ta elogio so S&P tin pa e strategia financiero y economico di gobierno. No tin mentira mas grandi cu esey. Tanto Eman como Herde mester tin berguensa y nan mester ta agradesido na MEP cu awe nan por broma cu un mehoransa chikito den e perspectiva. E simple hecho cu S&P a downgrade Aruba den 2013 y a mantene te awe ainda, ta prueba di maneho financiero y economico fracasa di AVP. Y esaki a culimna den e curatela financiero di Mike Eman y su gabinete. S&P no a duna ningun elogio pa esey. Pa loke ta trata e supuesto elogio di S&P pa e strategia economico di S&P, S&P a bisa cla y raspa: den 2015 economia di nos pais a crese cu solamente 0.1%. Bo kier bisami ki tipo di elogio esaki ta?” lider di MEP a finalisa bisando.

Expresionnan haci den e articulo aki no necesariamente ta refleha opinion di ArenaPoliti.co