“GDP growth in 2015 was only 0.1%, below our expectation, because of low private confidence, lower available income given the recent pension and health care reforms (which reduced available income), delays on the main government infrastructure projects, and the postponement of the Bahia Principe Hotel (the largest private infrastructure project in the pipeline)” 

Cu e palabranan aki Standard & Poors den nan relato di dia 6 di juni ultimo a expresa con malo e situacion economico di Aruba ta, y con esaki ta contra locual nan a spera. Ta pesey S&P a mantene Aruba downgraded desde 2013, y awor atrobe.  Lamentablemente Mike Eman ta mandando comunicado di prensa cada pasa un ora, pa gaba su mes cu e rapport di S&P den su man, insultando inteligencia di nos pueblo. Pero Mike Eman ta hasi esey pasobra e ta kere cu ningun hende ta lesa e rapport. Pesey laga nos desbarata e mentiranan di Mike Eman:

1. Standard & Poors NO a elogia e maneho financiero di gobierno: S&P a bisa cu door cu Aruba ta bou di curatela, y pues bou di e duim di Hulanda, e no por downgrade Aruba aworaki. Y pasobra Aruba ta bou di curatela, Aruba lo mester bai mehora su situacion financiero. Pero S&P no ta duna elogio na Mike Eman. Con bo por duna elogio na un hende bou di curatela? Mike Eman basicamente ta di compara cu un adicto, cu tin un adiccion di gasta placa, y mester a mara su mannan cu CAFT. Esey ta un elogio?
   
   
2. Standard & Poors NO a elogia e maneho economico di gobierno: es mas, lesa mas ariba, S&P ta expresa cu nan ta desapunta cu e cresemento economico casi nihil di Aruba anja pasa. S&P no a spera esey. S&P a spera un cresemento hopi mas halto a base di e storianan cu gobierno a conta nan. Nan ta skibi cu tanto palabra: BELOW OUR EXPECTATION. Acaso esey ta un elogio?
   
   

ECONOMIA STAGNA
S&P ta splica tambe pakiko e economia ta stagna. Como e prome motibo el’a menciona cu cuidadanonan no tin confiansa den economia di nos pais, y no ta inverti. Como di dos motibo, S&P a splica cu cuidadanonan a bira mas pober debi na tur e medidanan di Mike Eman y su gobierno. Medidanan di AZV, BAZV, BBO, AOV, edad di pensioen, etc. Nos pueblo a bira mas pober, y pesey no por gasta mas placa. Como di tres motibo S&P a menciona cu gobierno ta papia masha bunita di cantidad di proyecto, pero tin atrasonan grandi of ta fracasa den su proyectonan. Y ta pa e motibonan aki segun S&P nos economia ta stagna. E unico lus na horizonte ta cu e refineria lo bolbe habri, danki na e lucha incansabel di nos pueblo cu a kere den vision di MEP, y especialmente di colega Glenbert Croes. Esey ta e speransa cu nos tin di e promesa cu Solo Ta Sali Pa Nos Tur, y esaki ta e prome señal.

Mike Eman, en bes di purba manipula cu inteligencia di nos pueblo, mester gradisi MEP, cu awe e no a haya un downgrading mas peor. Pa esnan cu kier lese nan mes, esaki ta e link:
http://commodity-market-news.com/spgr-revises-aruba-outlook-to-pos-affirms-bbba-2-ratings.html