Perspectiva Independiente without background 001

Parlamentario mr. Xiomara Maduro (MEP): E MEGADEBE crea pa Eman a tranca nos economia den 2015

XM58
Di cada 1 florin 82 cent ta bay pa paga debe. 

Poco dia atras Banco Central a presenta su cifranan pa 2015 den su publicacion Annual Statistical Digest 2015. Den e publicacion Banco Central ta raporta cu pa 2015 e deficit di nos Pais tabata na 201, 7 miyon, e debe a yega na 3,9 biyon y di cada 1 florin, 82,2 cent ta destina pa paga debe. E cifranan aki ta ilustra cu e finanzas publico di nos Pais NO ta manehabel y ta splica tambe dicon e economia di nos Pais ta tranca. E MEGADEBE crea pa Eman a tranca nos economia den 2015 y lo keda asina te dia cu Gabinete Eman keda na mando.

Economia den peliger asina cu pasa 60 cent
Segun estudio di Fondo Monetario Internacional (IMF) ora un Pais su debe surpasa e scenario na unda cu 60 cent di cada 1 florin ta bay pa paga debe, e Pais ta drenta den un zona peligroso na unda cu no ta resta placa pa e gobierno por funciona debidamente y cune ta perhudica e economia di e Pais. Pa Paisnan manera Aruba, estudionan ta mustra cu nos por carga un debe na unda cu 40 pa 55 cent di cada florin por bay pa paga debe y ainda keda cu un finanzas publico manehabel. Pero e realidad ta cu cifranan asina nos Pais a conoce te cu 2009, ya cu asina cu Gabinete Eman a yega na poder nos a conoce un MEGADEBE na unda cu e debe a subi grandemente y cu awor ya di cada 1 florin 82 cent ta bay pa paga debe. Un situacion na unda cu finanzas publico ta sali seriamente foi man y e economia ta trance formalmente.
160706 BCA asd 2015
E desaster ta Eman a hacie
Ta un berguensa pa scucha Minister Eman bisa ainda na 2016, cu ela hereda un desaster financiero ora ela yega na poder na 2009. Ya cu tur cifra ta mustra cu e desaster ta Eman mes a hacie. Y danki na e MEGADEBE na unda cu 82 cent di cada florin ta bay pa paga debe, e economia di nos Pais ta tranca na 2015 perhudicando nos Pueblo.

Ningun senial pa refinancia
Un manera pa trece alivio pa e precion enorme cu e MEGADEBE crea pa Eman tin riba Pueblo, ta pa refinancia e debe na un interes mas abou. Na 2013 cu hopi fanfaria Minister Eman a gaba cu ela yega na un areglo asina cu Hulanda. Pero te dia di awe nada a bira realidad. Asina mes cu Minister Eman largo bay ta haci trabou di loopjongen pa Hulanda, e mandatario te ainda no por a saca beneficio di e trabou aki door di sikiera yega na un refinanciamento y alivio pa nos Pais pa un MEGADEBE cu e mes a crea pa nos. Nos no ta mira ningun senial cu Minister Eman ta bogando pa un refinanciamento di e MEGADEBE cu a tranca nos economia den 2015 y cu lo sigi asina te dia cu Gabinete Eman keda na mando.

6 juli 2016

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.