Apenas seis luna pasa algun politico a bisa cu e discucion riba e "geschillenregeling" ta algo di pasado. Nan a hasta cita un professor cu a bisa cu hamas Hulanda lo accepta un geschillenregeling, pasobra e no lo kier entrega e poder cu e tin como pais mas grandi den Reino. Pero den pasado e mes un cos a sosode cu e ideal di "status aparte". E lo tabata algo inalcansabel. Un tempo a hasta cita un politico Hulandes cu a bisa Aruba: "Die Status Aparte, die kun je op je buik schrijven." Awe no solamente Aruba tin e status autonomo den Reino. Corsow y Sint Maarten tambe. Loke un tempo tabata parse imposibel, a wordo logra pasobra tin hende cu si a kere den e ideal ey y no a cambia di idea pasobra tabata tin oposicion contra di e idea. Mescos awe, apesar di e resistencia y objecion di hopi, AVP a sigui insisti den crea un areglo den Reino pa duna veredicto den caso di diferencianan di opinion riba interpretacion di Statuto. Diferencianan di opinion manera a tuma luga aña pasa cu e "KB" cu gobierno di Reino a duna gobernadornan di Aruba y Sint Maarten. Awe den tur pais di Reino tin partidonan politico, abogadonan, institucionnan cu ta haya cu awor si mester crea un areglo asina.


PASINAN DI REINO
Durante di e reunion dialuna entre miembronan di parlamento di Aruba, Corsow y Sint Maarten, a sali bon cla con fuerte e deseo pa crea un "geschillenregeling" den Reino ta. Tur e tres paisnan di Reino aki ta haya cu ya no tin motibo pa warda. E motibo principal pa cu no por ta asina cu un di e cuatro paisnan di Reino riba su mes ta dicidi con ta interpreta ley y Statuto di Reino y e otro tres paisnan no tin ni caminda pa cana, si nan no ta di acuerdo. Entre partidonan politico di Hulanda mes cu tambe lo ta presente e siman aki na Aruba pa reunionnan, tin un grupo creciente cu tambe ta haya cu mester crea e areglo aki awor. Pesey e tema di e "geschillenregeling" ta asina central riba e agenda di e reunionnan entre parlamentonan di Reino (IPKO) di e siman aki. Rene Herde': "Cada biaha nos ta yega mas serca di crea e areglo aki. Nos ta convenci cu e ta bay bin, aunke e tuma tempo. Mester duna tur hende tempo pa custumbra cu e pensamento cu niun pais ta perde nada. Cu tur pais, no importa con chikito e ta, mester por apela na un organo independiente manera un corte, ora e ta sinti cu un pais mas grandi ta tuma desicion inhusto contra di su interes." E tema di e "geschillenregeling" ta wordo trata diahuebs awor den e reunionnan entre parlamentarionan di Reino.

Expresionnan haci den e articulo aki no necesariamente ta refleha opinion di ArenaPoliti.co