Den luna di December e cobransa di Setar ta algo cu tawata hopi den discusion mey mey di pueblo. Pa ta specifico e cobransa tawata mustra algo cual den nos opinion ta inhusto mirando e ilustracion di BBO y Health tax riba e factura.

Si nos haci un comparacion entre un recibo di november 2014 cu ta ilustra un suma di 205 florin y uno di December, bo lo nota un diferencia di biaha. Remarcabel ta cu den e recibo di november 2014 Setar no a agrega BBO riba e suma aki. De facto den e suma ta inclui e suma di BBO caba. Loke a resulta den un sorpresa ta e hecho cu e recibo cu lo mester wordo paga den luna di januari 2015 ta mustra cu tanto e BBO y e Health tax ta aparece (riba e mesun suma di 205 florin) riba e recibo.  Pues loke tawata mester ta inclui caba a resulta di bira un suma di 4% en total riba e servicio di comunicacion.

Nos tin entendi cu Setar lo ta paga alrededor di 3 miyon florin na belasting y cu esaki lo tin como efecto cu un suma di 5 miyon adicional lo mester bay wordo paga totalisando 8 miyon den caha di gobierno. Esaki mester wordo treci padilanti pasobra e no mester sosode di e forma aki nificando cu no tin hustificacion. E unico cos cu mester a wordo haci ta agrega e 1% di Health tax riba factura. Nos fraccion den pasado durante tratamento di e ley di “health tax” aki a señala cu gobierno no a percura pa informa comercio manera debe ser.

Expresionnan haci den e articulo aki no necesariamente ta refleha opinion di ArenaPoliti.co