Parlamentario mr. Juan E. Thijsen a tuma nota tanto di declaracion di Ministro di Finansas tocante e situacion financiero di pais Aruba den e prome kwartaal di 2017 y tambe di e ultimo rapport di Caft di 2 di juni tocante e finansas di Aruba. Parlamentario mr. Juan E. Thijsen ta constata cu tin un discrepancia grandi entre Bermudez y Caft. Segun Ministro di Finansas e situacion den e prome kwartaal a resulta loke a premira. Caft sinembargo ta bisa cu e situacion ta pio di loke a premira y cu e situacion di pais Aruba ta preocupante. "Het Caft meent dat de cijfers over het eerste kwartaal 2017 reden geven tot zorg". Di su banda Bermudez ta bisa: "No ta presupuesta pa kwartaal, pero pa aña. Tin cu tene cuenta e ora cu crecemento economico, cual tur hende sa cu ta depende di e actividadnan di e rehabilitacion di refineria. Falta 7 pa 8 luna pa e por habri. Ainda tin espacio pa realisa e presupuesto manera cu el a wordo formalisa den Parlamento."
E rapport di Caft di su banda ta indica entre otro cu e norma di 0.5% no a wordo alcansa, entradanan presupuesta a keda atras mientras gastonan entre otro di personal a subi. Esey segun Parlamentario mr. Juan E. Thijsen kiermen cu gobierno atrobe tin cu bai presta placa y asina ta subi debenan di e pais mas ainda. Problemanan financiero di nos pais no ta wordo soluciona y ta bisto cu e gobierno ta incapaz pa logra ainda.

1. Credibilidad 
Manera conoci den mundo financiero credibilidad ta hunga un rol grandi. E credibilidad di Aruba cada bes ta birando pio ya cu gobierno cada bes ta priminti y cada bes ta keda sin cumpli manera nos por wak. Ministro di Finanzas Bermudez no ta worry cu presion di Caft. Bermudez: "Una bes cu e presupuesto wordo formalisa y el a wordo aproba den Parlamento, ta esey pa Gobierno ta ley. Loke cu Caft ta haci, e ta supervisa e ehecucion y ta wak cierto momento cu e ehecucion ta keda den cuadro di e presupuesto".
Parlamentario mr. Juan E. Thijsen ta kere cu akinan Bermudez ta ekiboca su mes grandemente. Bermudez ta lubida cu mientras Aruba su credibilidad ta keda bai atras Gobierno di Reino no lo bai yuda Aruba cu prestamonan na interes abao ni cuanto Prome Ministro di Aruba y lider di AVP Mike Eman lembe. Manera ta conoci Aruba ta paga anualmente mas di 200 miyon na interes cual ta pisa masha hopi mes riba e presupuestonan di pais Aruba.

2. Un economia fuerte y sano ta e solucion. 
Gobierno di Aruba ta trata di sobrevivi di un maneho agresivo di cobramento di belasting y ta wardando entrada for di e refineria di cual AVP tabata contra su reapertura. Sin e refineria e situacion lo tabata mas dramatico. Sinembargo segun Parlamentario mr. Juan E. Thijsen e maneho economico di gobierno di AVP no lo ta suficiente pa resolve problemanan financiero pasobra ta bai bin acerca e pagamento bek di ppp-projectonan y tambe e necesidadnan urgente di pueblo manera den ensejansa, husticia y salubridad. Esey kiermen cu mester bin un economia mas fuerte. No solamente esaki lo trece entradanan nobo pa gobierno pero tambe e lo duna espacio pa introduci un aparato gubernamental nobo, eficiente y modernisa. Un maneho economico agresivo den e siguiente anjanan lo mester produci empleo interesante, di calidad y di bon pago pa esnan interesa pasa boluntariamente di sector publico pa sector priva. Segun Parlamentario mr. Juan E. Thijsen tanto un maneho di kita hende obligatorio no ta funciona y tampoco ofreciendo VUT-regeling ta funciona. Esaki historia a mustra hopi biaha caba. Solamente a base boluntario lo por baha gastonan di personal cu ta pisa hopi riba e presupuesto di Aruba. Acerca Parlamentario mr. Juan E. Thijsen ta kere den introduci cambionan laboral atractivo den e sector priva manera mas dia di vakantie, vakantieuitkering, kindertoelage etc. Di otro banda gobierno mester mas hende den cierto ramonan. Parlamentario mr. Juan E. Thijsen ta kere tambe cu gobierno mester ta mas realistico den cobranza di belasting. Comercio y cuidanonan hopi biaha tin boluntad pa paga pero no tin e espacio actualmente. Un prome paso di un gobierno nobo di MEP lo ta baha e cantidad di Ministro y di coordinador cu lo trece un spaarmento di por lo menos 50 miyon. Tambe crea credibilidad ta un urgencia pa haya e prestamo cu interesnan abao, cu lo por scapa un 200 miyon. Parlamentario mr. Juan E. Thijsen ta urgi pueblo pa sigui e desaroyonan di nos pais tanto financiero y economico y no permiti cu un gobierno di AVP sigui tin nos pais den un situacion na unda ni cuidadanonan ni comercio por sobrevivi. Al contrario a bira tempo pa hunto nos logra cambionan pa mehora e calidad di bida na nos pais. Parlamentario mr. Juan E. Thijsen y partido MEP ta cla pa e reto. Hunto p'e cambio sin miedo.

Expresionnan haci den e articulo aki no necesariamente ta refleha opinion di ArenaPoliti.co