Un delegacion di Fondo Monetario Internacional (IMF) tabata na Aruba pa analisa e situacion economico di Aruba. Pa por a yega na un analisis bon balansa tumando na cuenta dealster un detaye, e delegacion a tene deliberacionnan cu instancianan di peso riba tereno economico na Aruba, manera Banco Central y otro autoridadnan economico/financiero. Conclusion di e investigacionnan profundo aki a keda cla y poni den un rapport. Loke a resalta ta e positivismo cu ta bin dilanti den e rapport di IMF cu ta un instancia neutral  reconoci mundialmente pa su conclusionnan.

Conclusion di e rapport di IMF ta positivo pa loke ta crecemento economico di Aruba. Den palabranan cla y manera a wordo anticipa mirando e cifranan cu tin IMF ta bisa cu economia di Aruba ta creciendo. “Despues di un recuperacion fuerte y gradual di un dobel recesion – ciere di e refineria y e crisis mundial – economia di Aruba a crece na 2013 cu 4½ %. E dimension di actividad a sigui modera na 2014 y espectativa ta cu na 2015 e crecemento aki ta continua cu 2 ¼ %. Desempleo a baha y cifranan ta comproba esaki. Hopi pais na mundo lo kier tin e desempleo cu Aruba tin actualmente. Otro punto esencial den e rapport ta indudablemente e deficit cu a baha cu 5 ½ % na 2014. Esaki danki na e reformanan cu gobierno a haci den APFA, AOV y AZV. IMF ta constata cu e sector turistico a crece den forma abrumador, mescos tambe ta señala cu e proyectonan PPP ta un herment positivo pa desaroyo di economia di Aruba den tur sentido di palabra.

E rapport di IMF den liñanan grandi ta positivo y constructivo pa Aruba. Aruba ta riba e bon caminda. IMF ta premira cu na 2018 danki na e ahustenan haci door di gobierno e isla lo tin un surplus, manera gobierno a splica na varios ocasion.

Expresionnan haci den e articulo aki no necesariamente ta refleha opinion di ArenaPoliti.co