ORANJESTAD - Compara cu aña 2009, Aruba ta den un situacion hopi miho awor. Asina Minister de Meza a bisa durante e conferencia cu nan tabata tin diamars mainta den sala di prensa. Splicando e situacion cu "Gabinete Mike Eman (I)" a confronta cinco aña pasa, incluyendo e crisis mundial, e refineria cera, partnernan strategico manera KLM y Carnival Cruise Line cu a bandona nos isla, American Airlines cu a cuminsa baha frecuencia di vuelonan, y doñonan di hotelnan cu tabata evaluando pa cera y bandona Aruba. Ademas di tur esaki, Aruba tabatin un tasa di desempleo di 12%, cual e gobierno actual a logra baha te bou di 7%. E economia a conoce un reduccion di 15% y fondonan social tabata den un situacion hopi dificil, el a elabora.

Minister Mike de Meza a conclui cu e implementacion di dialogo social unda partnernan di gremionan social y comercial a contribui na decisionnan clave, a ofrece un base amplio pa bin cu cambionan structural pa problemanan structural y esaki ta dunando su frutanan awe. El a agrega cu e ta spera cu Dialogo Social lo por sigui como un parti integral di maneho di nos pais pa hopi tempo.

Tabatin decisionnan menos popular, pero tambe decisionnan positivo cu a wordo tuma y tur a duna un bon resultado; algo cu awo IMF tambe ta reconoce.

Aruba ta duna honor na nos pais, ta elogia e direccion di gobierno como esun corecto y ta encurasha Pais Aruba pa sigui riba e rumbo aki, haciendo algun cambio mas, pa yega na un surplus na aña 2018, Minister Mike de Meza a bisa.

E mandatario a elogia e miembronan di "Gabinete Mike Eman I y II" pa e decisicionnan tuma cu awe ta resulta den debenan cu ta wordo paga y cu e miembronan di comunidad cu menos entrada por mantene nan cabez riba awa. E proyectonan ta wordo ehecuta pa ora economia bolter pa e pais ta prepara pa ricibi inversionistanan cu tur servicio y productonan necesario na nan luga.

Expresionnan haci den e articulo aki no necesariamente ta refleha opinion di ArenaPoliti.co