ORANJESTAD - Awor cu e rapport di evaluacion di IMF ta cla, e ta duna rason na hopi cu a apoya e maneho di Gabinete Mike Eman II, manera entre otro, profesor Dr. Willem Vermeend, economista y autor John Perkins y particularmente ex-Prome Minister di Hulanda Jan Peter Balkenende, kende tabata hopi critico riba e forma con Gobierno di Hulanda ta atende cu Aruba e aña cu a pasa.

E tempo cu a surgi un conflicto entre Hulanda y Aruba encuanto presupuesto 2014, ex-Prome Minister di Hulanda Balkenende den forma categorico a defende e posicion di Aruba y e maneho cu a scoge tanto riba tereno di inversion como di desaroyo di energia renobabel.

Den e rapport di IMF ta para cu "desaroyo di e sector di energia renobabel ta brinda potencial.” Cu e parti aki di e rapport di IMF e palabranan di apoyo di Balkenende ta haya base. E tempo ey el a bisa cu "mirando con e isla ta, cu e proyectonan di renobacion, e proyectonan social, scoge pa un isla "berde", anto e Gobierno di Aruba realmente a haci un bon trabou."

E tempo Balkenende a critica e posicion estricto di Gobierno Hulandes. El a bisa cu Aruba ta trahando pa drecha e situacion, a tuma pasonan pa drecha e parti di finanza y cu Aruba a haci bon di inverti den durabilidad.

Tur esaki ta aspectonan cu tambe ta wordo menciona den e rapport di IMF cu su resultado a bira conoci siman pasa diabierna y a wordo ricibi cu satisfaccion door di Gobierno di Aruba, sigur si tene na cuenta tur e esfuersonan cu gobierno ta haciendo. IMF den su rapport ta bisa cu autoridadnan a realisa reformanan structural grandi den 2014 pa  atende cu e retonan fiscal. Nan ta menciona e reforma di pensioen AOV, primanan a wordo aumenta y gradualmente a subi edad di pensioen. Tambe a duna reconocemento na e cambionan cu a wordo haci den e sistema di pensioen maneha pa APFA, pa cual tambe edad di pensioen ta subi gradualmente y a menciona e impuesto lo cubri specificamente e gastonan di e sistema di salud AZV.

Gabinete Mike Eman II ta satsifecho cu resultado di e rapport pasobra e logronan cu ta wordo menciona ta door di traha duro pa convence tur e partidonan envolvi cu e cambionan aki tabata necesario, pa sigura stabilidad di Aruba. E ta mustra tambe e curashi cu Gobierno tabatin pa haci cierto cambio cu ta na bienestar di e pueblo a largo plazo pa sigura existencia di e tres fondonan publico, AOV, APFA y AZV.

Expresionnan haci den e articulo aki no necesariamente ta refleha opinion di ArenaPoliti.co