Perspectiva Independiente without background 001

Gobierno ta manipula opinion publico cu placa di Pueblo?

ReadingNewspaper
Siman pasa diabierna pueblo a wordo informa cu e rapport preliminario di IMF a wordo publica. Hopi a haya sa por medio di un comunicado cu a sali for di Departamento di Prensa di Gabinete Mike Eman II, cu e titulo “IMF positivo cu desaroyo y recuperacion economico di Aruba”. Durante e weekend di Carnaval no tawata tin mucho atencion pa politica, pero dialuna e rapport preliminario di IMF tawata den spotlight atrobe.


E cantidad di articulo tocante e rapport preliminario a pone varios hende remarca cu ta parse cu Gabinete Mike Eman II kier manipula opinion publico. Un lector cu ta pone bon atencion na loke ta sali den prensa a puntra un miembro di e team di ArenaPoliti.co dicon ArenaPoliti.co ta pone Gabinete Mike Eman II como fuente/escritor di varios comunicado, mientras cu e lector a lesa e mesun comunicadonan otro caminda, sin mencion di e fuente. Segun e lector e no tawata sa cu tanto articulo cu ela lesa den prensa, elogiando Gabinete Mike Eman II, a sali for di oficina di prensa di Gabinete Mike Eman II mes.

ArenaPoliti.co a splica cu, riba nos website, e comunicadonan ta wordo separa for di articulonan original. Riba e homepage di ArenaPoliti.co articulonan original ta aparece links, y comunicadonan memey. Den e mobile view articulonan original ta ariba y comunicadonan abou. Si ta un comunicado, ArenaPoliti.co tambe ta pone e fuente dilanti den e titulo, hasta si nos ricibi e comunicado sin mencion di e fuente den e titulo. P’esey hopi comunicado riba ArenaPoliti.co ta cuminsa cu “Gabinete ME II: ……” nificando cu e comunicado a sali for di Departamento di Prensa di Gabinete Mike Eman II.

Mal uso di fondo publico?
E pregunta ta surgi si ta trata di mal uso di fondonan publico. E rasonamento ta cu empleadonan, cu ta wordo paga cu placa di pueblo, ta wordo instrui pa scibi y manda hopi articulo cu ta defende e maneho di Gabinete Mike Eman. Cuanto comunicado? Mastanto ta alrededor di 2-4 comunicado pa dia, 5-6 dia pa siman. E comunicadonan aki no ta cubri tur ministerio. Un solo bishita di sr. Mike Eman den bo bario por resulta den 4 comunicado. Dornamento di un (1) rotondo durante temporada di Pasco por resulta den 4 comunicado. Pues, no mester ta un sorpresa cu e rapport preliminario di IMF a produci hopi mas comunicado.

Lo tin hopi ciudadano, manera e lector cu a haci nos e pregunta, cu regularmente ta lesa articulonan elogiando Gobierno, sin sa cu ta e mesun Gobierno ta produci e articulonan aki, financia cu placa di esnan lesando. Kisas no ta facil den tur caso pa distingui un comunicado cu ta apropia pa sali for di oficina di Gobierno, for di propaganda politico. Si tur medio di comunicacion semper menciona for di cua instancia of persona un comunicado a bin, pueblo lo ta den un miho posicion pa conclui pa nan mes si loke nan ta lesando ta apropia pa sali for di oficina di prensa di Gabinete Mike Eman, y si ta trata di bon of mal uso di fondonan publico.
Na final di dia, minister presidente Mike Eman ta responsabel pa loke ta sali for di su departamento di prensa, y medionan di prensa ta responsabel pa e forma cu comunicadonan ta wordo presenta.

Aki por lesa comunicadonan tocante e rapport preliminario di IMF, cu tur a sali for di Departamento di Prensa di Gabinete Mike Eman II. Te ainda ta 10, den menos cu 1 siman. Kisas ‘ainda falta’.
[update: 11]
  1. IMF positivo cu desaroyo y recuperacion economico di Aruba
  2. IMF impresiona con Aruba a recupera di dos reto
  3. IMF ta Elogia Reformanan cu Gobierno a Introduci a base di Consenso cu Partnernan Social
  4. Fondo Monetario Internacional (IMF) “E Maneho di Energia di Aruba ta Promete Desaroyonan Economico Positivo”
  5. IMF ta elogia y sostene gobierno di Aruba pa loke ta e reformanan grandi haci den tres fondo publico
  6. Minister President Mike Eman: Aruba Contento cu Elogio y Recomendacionnan di IMF
  7. Minister Mike de Meza ta sumamente orguyoso di mira resultado di assessment di IMF
  8. IMF ta reconoce decisionnan positivo cu a wordo tuma y tur a duna un bon resultado
  9. IMF ta duna sosten completo na vision di energia renobabel
  10. Economista Prof.dr. Willem Vermeend: Rapport di IMF ta un impulso pa Aruba
  11. Sosten di Expertonan pa e maneho economico di Aruba ta refleha den ultimo raportahe di IMF

 

*Kisas un miho uso di fondo publico lo ta pa traduci e rapport preliminario den Papiamento pa mas ciudadano por les’e y compronde pa nan mes.
*Tur politico tin derecho pa comparti nan opinion por medio di comunicado. Ta un bon manera pa comunica cu pueblo. Banda di e comunicadonan di Departamento di Prensa di Gabinete Mike Eman II, ArenaPoliti.co regularmente ta ricibi comunicado di parlamentario y politico di diferente partido tambe (AVP, MEP, PDR, UPP). E articulo aki no ta cuestiona e politiconan aki, pasobra, te unda cu nos sa, e politiconan aki ta scibi y manda articulo sin haci uso di empleado y fondonan publico.
*ArenaPoliti.co ta reconoce cu un departamento di prensa di un gobierno tin un tarea importante den informa pueblo. Loke ta wordo cuestiona ta si e departamento ta wordo mal usa pa manipula opinion publico, y si e cantidad y (cierto) tipo di comunicado por wordo considera mal uso di fondonan publico.

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.