Minister Otmar Oduber ta lamenta cu nunca antes a haci esaki 

Diahuebs mainta Minister Otmar Oduber hunto cu DOW, Departamento di Cultura y Comision Celebracion Dianan Nacional (CCDN) a bishita Plaza Betico Croes pa mira e estado den cual e plaza ta y wak tur loke mester wordo haci pa renove.
Minister Oduber a bisa cu e preparacionnan a cuminsa pa e celebracion grandi cu tin otro aña, 30 aña di Status Aparte y 40 aña di Himno y Bandera.  Den e cuadro aki mirando cu pa e celebracion cultural semper ta usa Plaza Betico Croes a dicidi di mira e con e situacion di e plaza ta.
“Mi ta lamenta masha hopi mes di mira e condicion den cual e ta aden, casi 30 aña y practicamente nunca a haya un mantencion, a haya un beurt pa mantene. Apenas 5 aña pasa a haci un trabou riba e dak cu tin den e koepel di e plaza, pero esey tambe ta den condicion pesimo”, Minister Otmar Oduber a indica.
Pesey  hunto cu DOW y Departamento di Cultura a inspecciona e lugar y mira tur loke mester wordo haci y kico mas por realiza pa haci e mihor uso di e espacio cu tin. Intencion ta pa por haci di Plaza Betico Croes un sitio multifuncional caminda lo por duna training, les, baile y diferente otro aspecto cultural. Esaki lo bay sosode na e parti abou di e stage cual no ta wordo usa. Tambe lo percura pa e back stage haya airco mirando e calor cu hopi biaha artista ta keha di dje y lo atende cu e otro aspectonan di e parti aki pa haci uso optimal di dje.
Igualmente  lo duna henter un beurt na henter e plaza pa dune un aspecto nobo, un aspecto mas moderno, un aspecto mas atractivo di loke e ta na e momentonan aki.
E mandatario a remarca un biaha mas cu ta di lamenta cu ningun Gobierno a duna e atencion necesario na e plaza aki y e ta contento cu hunto cu DOW, Departamento di Cultura y CCDN lo bay duna Plaza Betico Croes e atencion debido.
Ya caba ta conversando pa mira for di unda e fondonan lo bin pa percura cu e plaza wordo drecha na tempo pa e por ta cla otro aña pa e celebracion grandi.

Expresionnan haci den e articulo aki no necesariamente ta refleha opinion di ArenaPoliti.co