E siman aki diahuebs 26 november 2015 ta marca e di 29 aña di fayecimento di Gilberto François "Betico" Croes, fundado di Movimiento Electoral di Pueblo (MEP). Si mi no ta hera mi a topa Betico dos biaha den mi bida pero sigur mi ta corda cu nos a topa brevemente na Aeropuerto di Aruba, tempo cu mi tawata un mucha. Storianan di Betico mi a scucha di varios hende di su generacion particularmente di mi ruman homber cu tawata biba na San Miguel y Betico tawata frecuenta su cas.

Como un persona cu semper a tuma interes den politica mi a bay studia tur e grandinan den politica Arubano. Logicamente ta varios personahe a domina riba e tereno aki pero niun no a inspira mi manera Betico. Con el a sali na defensa di e pueblo di Aruba, anto con e no a laga nada cambia su meta pa un Aruba liber y prospero pa un y tur.
Durante campaña di 2013 como candidato politico riba lista di MEP mi a siña mas ainda di e gran personahe aki. Ta varios porta di cas a habri pa scucha mi mensahe, pero e tawata pa mi un placer ora nan conta mi di Betico y con el a gana nan confiansa. Su perseverancia y carisma, su balor humano y su astucia politico. Semper mi a keda motiva y inspira pa scucha di su lucha y su anhelo pa un pais autonomo den Reino Hulandes. Con el a lucha rond di Aruba sin distincion y con hende cu atencion tawata wak y scuch’e na television y radio. Varios ciudadano a conta mi cu Betico tawata come, bebe y drumi di politica, esaki tawata su pasion. Cada aña mi tawata wordo inspira pa su dia nacional, pero mas aun mi a wordo inspira con el a hura na Dios cu e no lo descansa te cu Aruba ta baas den su mesun cas. 

Betico a sa di para pa un ideal anto esaki ta haci’e e personahe mas grandi di nos isla sin pone of kita. Nos mester ta gradicido na Dios pa manda un Betico pa nos y nos mester conserva y preserva e libertad di nos digno pueblo den su honor. Na su famia, su señora viuda, yiunan y e famia grandi di MEP, ban sigui balora e gran Arubano aki pasobra tur pueblo tin nan heroë(nan) y Betico ta di nos.

Expresionnan haci den e articulo aki no necesariamente ta refleha opinion di ArenaPoliti.co