Di un ‘much’i campo cu no tawata tin e derecho di bira minister’ pa e estadista mas respeta di nos pais. Un maestro di scol. Hopi lo a pensa cu un abogado of otro profesional lo ta un miho politico cu un docente. Pero kisas e abilidad di e docente aki pa splica y trece puntonan dilanti a dun’e un calidad cu hopi di su coleganan politico no tawata tin. Su carisma tambe tawata un elemento esencial den su carera politico. Y nos no mester lubida su conseheronan. Si e mes tawata tuma decisionnan importante, ta conosi cu Betico tawata scucha diferente opinion prome cu e tuma su decision. Pero probablemente, su liderazgo ta e calidad mas importante como politico. Te awe keto bay tin hopi mas abogado y docente, cu tin lider berdadero.


Blueprint
Betico ainda ta inspira hopi politico. Studia Betico ta revela un ‘blueprint’ di con pa gana un lucha. Strategia, determinacion, pasenshi. E tawata tin un meta concreto. E la convence pueblo pa sostene e lucha. E tawata sa ki ora pa manifesta, ki ora pa pone Aruba plat, y ki ora pa bisa Hulanda cu si mester, ‘met geweld’ y sanger e meta lo wordo logra. Pero e tambe tawata sa ki ora pa sinta na mesa y debati. Bon prepara, Betico tawata enfrenta oponentenan politico. Of lanta para for di mesa y bandona sala. Sin miedo. Diferente strategia pa diferente situacion, cu hopi biaha den combinacion ta duna resultado.

Tawata un isla chikito y simpel contra Hulanda, y den diferente forma tambe contra e otro islanan den Antiyas. Hasta na Aruba mes tawata tin resistencia. Con bo ta pone presion riba Hulanda sin sosten den Reino? Parti di Betico su strategia tawata pa aserca y splica paisnan y instancianan internacional loke ta pasando y loke Aruba kier. Paso mientras cu Hulanda ta manda den Reino, mundialmente Hulanda ta un pais relativamento chikito. E strategia aki, combina cu ta dispuesto pa bay ‘all out’ pa logra e meta, sigur lo a yuda traha luga pa Aruba sinta na mesa y wordo scucha. E blueprint t’ey. Pa ehecut’e ta otro storia.


Union
Na Aruba (y rond mundo) ta custumber pa wak partidonan politico pone e bienestar partidista prome cu e bienestar di pueblo en general. Mientras cu Betico tawata sa bon con pa campaña pa su partido, tambe tin ehempelnan di con Betico tawata bay mas leu pa uni mas hende, pa un meta mas grandi cu cualkier partido politico. Betico a uni ciudadanonan, gremio, otro partidonan politico, incluso partidonan sin representacion den parlamento/eilandsraad, manera tawata e caso den e Raadscommissie Onafhankelijkheid Aruba (RCOA). E union cu Betico a logra ta e fundeshi solido di e lucha. Ni con inteligente y capacita bo ta, sin pueblo bo tras, bo no por logra cosnan grandi pa nos pais. E poder berdadero ta keda serca pueblo.


Arubiano
Con Aruba ta recorda Betico? Hopi ta yame nos ‘Libertador’, otro ta haya e palabra ey ta bay mucho leu. Hopi ta admir’e, otronan ta desacredita su logronan. Sentimentonan partidista ta afecta opinion publico. Tin politico ta respet’e y siña di dje, otro ta purba imit’e. Tin ta us’e pa purba haya voto, otro ta purba cambia historia. Den tur esey, hopi ta lubida cu, mas cu un ex-miembro di AVP of fundador di MEP, Betico ta un Arubiano. Un estadista respeta cu a resulta di ta e persona mas importante den e lucha pa nos Status Aparte. 


Helmin Wiels papiando di Betico Croes

Expresionnan haci den e articulo aki no necesariamente ta refleha opinion di ArenaPoliti.co