[Video] Betico Croes durante campaña: “Libertad ta trece cune Responsabilidad”
Betico Croes a hiba e discurso aki (video) durante e campaña electoral pa eligi e prome Parlamento di Aruba (november 1985). Tawata un tempo cu basta reto considerando cu Lago a cera, cual e tempo ey tawata tin un impacto negativo hopi mas grandi compara cu e diferente ceramento di refineria mas recien. Desempleo tawata alrededor di 35% y entradanan a cay drasticamente. Tur esaki net prome cu e Status Aparte cu a wordo logra na 1983, lo bay na vigor. Enfrentando e crisis, MEP a dicidi pa introduci un ‘impuesto di solidaridad’ y a baha sueldonan. MEP tambe a negocia un trato preferencial cu Venezuela y asina a preveni un aumento substancial di prijs di gasolin. E logro di nos Status Aparte, cierre di refeneria, medidanan (‘impuesto di solidaridad’ y a baha sueldo) y inventividad (negocia trato preferencial pa prijs di gasolin) tur ta aspectonan cu ta refleha den e palabranan “Libertad ta trece cune responsabilidad.”
MEP a resulta e partido mas grandi despues di eleccion (8 asiento) pero no a forma parti di e coalicion cu a goberna. E prome gobierno di pais Aruba a wordo forma pa AVP (7 asiento), PPA (2 asiento), PDA (2 asiento) y ADN (2 asiento). E coalicion tawata bou encargo di ministro presidente Henny Eman, cu a logra haya 4.949 voto. Betico Croes a interpreta e caida den sosten pa MEP usando e palabranan ‘materialismo a vence idealismo’.
A pesar di e decisionnan impopular y e caida relativo den sosten pa MEP, Betico Croes tawata e vote-getter cu 8.879 voto. Te ainda ningun otro politico a logra tanto voto den un eleccion parlamentario di Aruba. Mester remarca cu e tempo ey tawata tin un cantidad di ciudadano y votado substancialmente mas abou compara cu awo. Na 1985, 8.879 voto tawata 20,46% di tur voto. Pa pon’e den perspectiva, na 2013 un politico lo mester a logra 11.938 voto pa logra 20,46% di voto.
Lesa mas di Betico Croes aki: bit.ly/Betico
Video: Archivo Nacional Aruba
Expresionnan haci den e articulo aki no necesariamente ta refleha opinion di ArenaPoliti.co