Prome Minister Eman ta duna splicacion detaya. 

Nan no ta parce di por compronde solucionnan duradero, sostenibel y structural 

ORANJESTAD – Prome Minister Mike Eman a invita prensa local pa un conferencia di prensa dialuna mainta den cua el a trata varios tema di interes pa pueblo di Aruba. Un di e preguntanan cu miembronan di prensa a haci tabata relaciona cu cierto expresionnan di miembronan di parlamento di partido MEP tocante di e ley di CAFT cu ta bay parlamento dentro di poco.

E obhecion di e miembronan di oposicion aki ta referi na cu e ley lo bin cu cierto medidanan. E contesta di sr. Eman tabata hopi simpel: “E ley aki no tin nada di haci cu medidanan”. Loke gobierno ta treciendo pa aprobacion di Parlamento di Aruba ta pa yega na un presupuesto balansa, cu tempo baha e deficit y finalmente reduci debe di Pais Aruba. E proceso aki, segun splicacion di Prome Minister Eman, ta hancra e ora den ley. Segun cifranan di 2014 di Cft, deficit di Aruba tabata na 9%. Cu e ley aki ta pone e metanan cu mester logra pa yega na un presupuesto balansa na 2018. Pa 2015, Prome Minsiter ta splica cu Aruba mester yega na 3.5% di nos GDP na deficit. “Nos mes ta pensa cu e presupuesto, manera cu el a wordo amenda tambe dor di fraccion di AVP, a trec’e te hasta na 3.2 pa 3.3%. Esey kiermen cu nos ta den e margennan.” Pa otro aña, e deficit mester ta na 2% y pa su aña despues na 0.5%.

“Semper cu mi a tende oposicion, nan tabata totalmente diacuerdo cu nos tin di yega na reduci nos deficit. Nos tin diferencia di opinion si semper cu e fraccion di MEP, cu semper ta pensa cu ta cu medida so bo por logra di baha bo deficit. Nos ta kere cu mester haci cierto ahustenan. Sigur sigur! No semper pa entrada pa gobierno, pero pa sigura cu bo fondo di pension publico ta keda solido, seguro di AZV ta keda solido, cu bo pension di behes ta keda solido, e pasonan ey, nos a tuma nan tambe. Nos ta hopi contento awe pa por bisa cu aunke nos a haya e fondo di pension di ambtenaarnan cu un dekkingsgraad di ta bankarota, e lo a kibra y seis mil pensionado lo a keda sin pension, nos a ahuste, haci e cambionan y awe e dekkingsgraad ta 100% y ta treciendo un stabilidad, no unicamente pa esnan cu ta haya pension awe, pero tambe pa esnan cu tin di haye den futuro.”

Prome Minister a enfatisa cu e situacion tabata mescos cu e fondo di AOV. “Nos a haye den un situacion deplorabel, un situacion cu nos no por a sigui paga nos casi 20 mil pesionadonan di SVb cu ta depende di un pension di behes.” E ta sigui splica cu a haci e reforma y a introduci modificacionnan y ta asina leu cu e fondo di AOV ta uno cu por segura pension di behes di tur grandinan di Aruba riba termino largo.

Sr. Eman a duna un muestra di con MEP, cu awe ta den oposicion, semper a purba resolve cualke problema cu medida y nunca a purba resolve problemanan di pais Aruba di un manera structura. “E prome cos cu nan ta haci ta medida, medida, medida tras di medida. Si bo bay den historia di Aruba, cada un di e medidanan cruel, cu a corta den e curazon y alma di nos conciudadanonan tin un signatura, y e ta di partido MEP.”

“MEP a introduci 8.2%, AVP a bin y el a kite. MEP a kita 73/4% di ambtenaarnan, AVP su gobierno a bin y duna ambtenaarnan 73/4% bek. MEP a introduci un medida di aumento di invoerrechten di 5% 'accross the board' pa tur producto. Un gobierno di AVP a bin y a dune bek.”

Prome Minister a enfatisa tambe con MEP tin un tendencia hopi estricto pa kita indexering di trahadornan publico. “MEP a introduci indexeringsstop pa 5 aña largo entre 89 pa aña 94. 5 aña largo ambtenaarnan no a haya indexering, no a haya ahuste. Un gobierno di AVP a bin duna 'inhaalmaneuvre', duna indexering.” Aunke esaki ta den añanan 90, Prome Minister Eman ta mustra cu MEP den su gobierno anterior a haci precisamente mescos un biaha mas.

“Ora MEP a bin na poder atrobe na 2001 te cu na 2009, a bolbe introduci indexeringsstop 8 aña largo, a bin cu BBO y un cantidad di medida y AVP a bin y a reduci e BBO na 1 y mei porciento. Berdaderamente tin e 2 porciento di AZV, pero esey ta pa nos por carga nos AZV y nos a cuminsa duna tur nos empleadonan publico nan indexering bek, duna empleadonan den sector priva reparatietoeslag y nos pensionadonan reparatietoeslag. Kiermen un cambio total di forma di anda cu e fondonan di pais pa inverti den nos scolnan, den nos barionan, nos centro di ciudad y inverti den e poder di compra di nos conciudadanonan.”

“Y nos ta compronde cu ta haci hopi dolor na oposicion, pa mira cu un gobierno den dos periodo ta bay haci dos cos grandi,” Prome Minister a enfatisa. E ta referi aki prome na drecha e situacion economico cu su gobierno a haya Aruba aden. Fondo di APFA, di pension di behes y AZV tabata bankarota. A inverti y haci ahustenan y awe e fondonan aki ta un bes mas sostenibel. Gobierno lidera pa Sr. Eman a percura tambe pa inverti den e infrastructura decayente di Aruba. A renoba barionan, centronan di ciudad, a cuminsa cu construccion y renobacion di Hospital, construccion di waf di container nobo na Barcadera y a cuminsa cu un vierbaansweg pa San Nicolas. Tur esaki ta den cuadro di inverti den e necesidad y pontencial economico di Aruba. Tur e proyectonan aki Aruba tabata tin mester pa 30 aña largo caba, a planea y pensa riba nan, pero ningun gobierno tabata tin e boluntad pa por a hacinan.

E di dos cos grandi, cu ta haci MEP hopi dolor, ta cu despues di a haci tur e inversionnan aki, incluyendo tambe renobacion di areanan publico y scolnan tur rond di Aruba, awo e gobierno aki ta enfoka riba algo cu despues di 30 aña ta bay termina. Pa 30 aña no tabata tin presupuestonan balansa. “A papia hopi di debe, pero 30 aña largo tur gobierno a crea deficit cu a crea debe,” Prome Minister Eman a pone cla cu, “esaki ta e gobierno, cu e signatura aki, cu ta percurando pa recuperacion economico y na e mesun momento tambe un presupuesto balansa.”

Sr. Eman a bisa cu e ta compronde cu esaki por haci dolor na e miembronan di oposicion cu no tin mucho mas di papia. “Ayera ta papia di refineria. Awe no ta papia mas di refineria, awo ta bay bek pa CFT, pero nan mes a bay Hulanda dies biaha bisa Hulanda, debe, debe, debe y awo cu nos tin un ley, pa en todo caso garantisa cu tur gobierno, tin cu tene nan mes na normanan pa nos por tin deficitnan reduci y despues un ‘balanced budget’ tampoco no ta bon.”

Na final di e discurso di Sr. Eman el a añadi cu, “ta dificil pa satisface e miembronan aki, pero nos lo keda purba.”

Expresionnan haci den e articulo aki no necesariamente ta refleha opinion di ArenaPoliti.co