Perspectiva Independiente without background 001

Booshi Wever (UPP): Ley di All-Inclusive tin un embergadura grandi, cu mester wordo discuti mas amplio, y cu no por wordo bulldoze sin mas pa capricho di Otmar

UPP01
Un di e discusionnan cu ultimamente ta capta atencion, ta esun di e Ley di All-Inclusive pa hotelnan, cu Otmar cueste loke cueste kier pasa den Parlamento, sin duna oportunidad na un discusion habri, sano y sensato, y cu tur gremionan envolvi.
UPP kier ta cla riba e asunto aki. 
Si enberdad tin estudionan haci, cu ta indica cu e fenomeno di hotelnan All-Inclusive lo NO ta na bienestar pa e industria turistico di Aruba, pa nos economia y nos comunidad, anto sigur esaki lo mester wordo atendi pa mira con por mitiga mas tanto cu ta posibel e consecuencianan di esaki. 
Si ta necesario pa bin cu cierto proteccion pa e industria turistico, esta den e tipo regular, anto sigur mester mira con nos por proteha esaki mas tanto cu ta posibel.
 
Pero tambe UPP ta enfatisa, cu - mirando cu ta trata aki sigur di un topico di sumo importancia pa tur stakeholder - e discusion mester wordo hiba na un nivel mas halto, unda cu den un dialogo nacional ta duna tur e stakeholdernan aki e oportunidad pa trece nan puntonan di bista dilanti.
UPP ta propone pa atende e ley di All-Inclusive mescos cu ta e caso cu e amienda pa cambio di nos codigo civil relaciona cu “geregistreerd partnerschap”, cu pronto tambe kier pusha den Parlamento.
 
Importante ta cu mester tin un discusion habri y transparente, pa asina cu - na momento cu Parlamento bay over na tuma un decision - e resultado di e discusionnan nacional aki, sirbi como guia den tumamento di un decision. 
Esaki sigur ta bira mas necesario ora nos tuma nota di e diferente opinionnan cu a bin dilanti den e asunto di All-Inclusive y tambe di e hecho cu Otmar no kier ta transparente dor di no haci e raportnan cu a wordo traha te na momentonan aki, publico. 
No por ta asina, cu a base di un bay-bin den corant y riba rednan social, Otmar ta purba di convence tur hende cu e concepto di ley cu e ta presentando, mester wordo tuma sin mas, ya cu ta e tin e razon final.
E hecho cu Otmar ta sigui insisti, ta muestra cu e ta purá pa e ley aki pasa, pasobra e ley aki lo bay dune mas oportunidad pa "wheel and deal"!!
 
Loke cu UPP a bin comprende, ta cu e ley aki ta duna e minister di Turismo hopi poder pa tuma decisionnan  riba asuntonan cu ta relaciona cu e aspecto di All-Inclusive. 
Por ehempel ora cu un hotel mester tin mas cupo di All-Inclusive cu ta permiti, p.e. pa motibo di un convencion grandi cu ta wordo teni, ta e minister ta esun cu lo dicidi si e hotel ta haya un excepcion temporal p’esaki. 
 
Conociendo con Otmar den pasado a opera den Fondo Desaroyo San Nicolas, y conociendo con Otmar a percura pa bin cu tur sorto di construccion pa asina enrikese su mes, ki garantia tin cu no ta bay pasa mescos pa loke ta hotelnan All-Inclusive? 
UPP ta kere cu no mester laga esaki den man di un minister, particularmente no den man di Otmar, pero mester establece reglanan y un proceso transparente,  hincando esaki den man di un instancia cu lo por tuma tipo di decisionnan asina pa evita cu por tin corupcion den esaki. 
Mester evita cu tin pasamento di placa bou mesa, manera a bin ta sosode den e caso di Fondo Desaroyo San Nicolas den pasado, y loke nos tur por mira cu ta pasando keto bay, den un forma structura y nechi actualmente.
 
Nos di UPP ta kere tambe cu Parlamento mester tuma su rol di controla gobierno - tambe ora ta trata di presentacion di ley y e rol di sali na vanguardia di interes di nos pueblo - na serio. 
Ta mas na su lugar pa Parlamento wanta e ley aki un rato y manda pidi minister Otmar Oduber pa haci tur documentacion necesario publico. 
Igualmente pidi tambe pa bay bek na mesa den un discusion real, transparente y serio na nivel nacional pa asina un ley cu mester bini pa salbaguardia interesnan di Aruba, por carga e sosten nacional cu ta necesario. 
Parlamento mester evita pa sigui duna Otmar mas poder, manera cu ya caba a bin ta haci pa 7 aña, unda cu fondonan a wordo crea, y na unda cu Otmar tin esakinan na su disposicion, NO na bienestar di turismo riba su mes, pero na bienestar di Otmar su amigo- y compinchinan, y principalmente na bienestar di Otmar mes, tanto personal como su imagen. 
Un poder cu a wordo duna na dje, cu awe tin partido AVP den un percancia grandi unda cu defacto tin dos gobierno. Esta esun di Otmar na unda ningun colega por bise nada, y pio ainda, cu gran parti ta depende di dje, y esun di Mike Eman.
 
UPP ta keda insisti cu Parlamento mester para e ley aki, pa asina evita cu Otmar ta haya mas poder den su man. Mescos cu ta e caso di e taxistanan, unda nos ta mira cu el a haya ta bon pa cambia ley di tal manera, cu e taxistanan y nan famia awor ta na merced di e persona aki. Aki tambe e tin tur poder pa "wheel and deal", y parce cu ningun hende no por pare.
 
UPP mas y mas ta convenci cu mester MARA  MAN di e politico por medio di introduccion di reglanan di  BON GOBERNACION. Esaki dia pa dia ta bira mas fundamental pa sobrevivencia di nos pais y nos pueblo. 
E no ta un luho sino mas bien un necesidad, un exigencia y un condicion pa asina nos por garantisa nos Status Aparte. 
Awor palabra ta na Parlamento: nan lo ta complice pa duna Otmar mas poder, of nan ta para esaki!!  


Den nomber di Union Patriotico Progresista – U.P.P.
Candelario  A. S. D. – Booshi – Wever
Brazil, augustus 2, 2016

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.