Partido UPP a tuma nota di e reaccionnan di tanto sra. Desiree de Souza-Croes y sr. Rudy Lampe, riba e website di ARENAPOLIT.CO unda cu ambos persona a duna un reaccion riba loke e.o. partidonan di oposicion MEP, PDR y UPP a presenta relaciona cu topico di e amienda entrega pa “registracion di partner” den nos codigo civil. Ta trata aki di varios aspectonan cu a wordo trata manera esun di consulta cu pueblo (referendum), tambe tocante e vehiculo di un amienda contra di un cambio di ley, y un estudio, y UPP ta enfatisa un discusion, debido pa wak kico ta e consecuencianan di introduccion di e tipo di registracion aki.

Refleccion
UPP kier enfatisa cu, apesar kier hiba e discusion aki den un direccion di ken ta pro y contra, esaki no mester ta e caso. UPP ta kere cu mester tin un discusion, un dialogo mas responsabel riba e topico, cu tur esnan concerni pa asina aki por yega na un bon “judgement”. Pasobra aki ta trata di un topico hopi fundamental, profundo y delicado y cu ta afecta nos comunidad den multiple forma. Ta trata aki di un proceso cu no di un dia pa otro por wordo imponi. Hopi biaha nos kier sigui “trend”-nan cu nos ta topa of mira den mundo. Pero e realidad ta tambe cu e desaroyonan cu a bin ta tuma lugar den mundo tambe a tuma nan tempo. Hopi biaha ta tuma Hulanda como ehempel. Asina por menciona cu ya caba for di añanan 60 di siglo pasa a hiba e discusionnan aki y ta tarda como mas cu 30 aña despues, esta na 1998, unda cu Hulanda ta acepta “registracion di partner”, manera proponi actualmente. Ta tarda despues di esaki casi 20 aña pa Hulanda acepta casamento di mesun sexo. Pues ta un proceso di discusion, tambe emocional, cu a tuma su tempo. Y aki na Aruba nos kier haci esaki den 7 siman di tempo, anto por medio di un amienda riba nos Codigo Civil, cu na e momentonan aki ta wordo trata. Esaki ta haci cu no por introduci un cambio asina den e forma cu sra. de Sousa-Croes kier hacie.

Referendum
Sra. de Sousa-Croes ta considera e idea di un referendum como un muestra di "brevet van onvermogen" pa e propio funccion di Parlamentario. E ta considera esaki como un schuifmento di e responsabilidad di Parlamento den direccion di pueblo.
E Parlamentario parce di ta biba cu e pensamento cu como Parlamentario e ta haya e poder absoluto, ta bira omnipotente, pa tuma un decision asina crucial y no ta kere cu Pueblo lo no tin e capacidad pa por haci esaki. Mescos cu sra. de Sousa-Croes kier sali como un lider pa e grupo di LGBT, e mester por permiti, pa e pueblo tambe tin su lidernan cu por vocifera nan pensamentonan. Awor aki sra. de Sousa-Croes ta pone un presion den nos comunidad dor di kier mira ken ta pro of contra. Pero pa UPP esaki no ta cuestion awor aki di ken ta pro of contra, sino mas bien cu na momento cu un decision al respecto wordo tuma esaki ta conta cu e sosten den henter nos pueblo.
Mientras cu sra. Croes-de Sousa ta reacciona contra di oposicion, di parti di gobierno ministernan ta keto, cu excepcion di uno cu no tin pensa di bin bek toch. Nan pensamento ta cu e amienda ta algo di Parlamento. Cu otro palabra, mientras cu un Parlamentario cu 300 voto y otronan cu menos, ta considera cu lo no mester consulta cu pueblo, y no kier duna su mes un "brevet van onvermogen", ta kere cu nan tin suficiente representatividad pa tuma un decision pa un pueblo. Mientras tanto e representividad real ta den e mas di 50% di votonan popular di 2013 cu ta gestock den oficinannan di gobierno y cu aparentemente nan no tin opinion.
Di su banda sr. Lampe ta considera e formato di un referendum como un “no” camufla. E ta referi hasta na e ley nobo di LTU cu tempo cu mi persona tabata ministro, como uno cu mucho mas enbergadura y cu lo mi no a pidi pa un referendum. Aki sr. Lampe ta bolbe tira algo den laira, sin menciona kico realmente ta e parti di LTU cu tabata di embergadura grandi, fundamental of delicado. Kizas e ta referi na e regulacion di 3 aña, cu awe no ta wordo practica y cu nos tur por wak su consecuencianan negativo?
Sr. Lampe ta haya cu un grupo chikito no por wordo depriva di derechonan dor di un grupo grandi. Atrobe UPP kier mustra aki, cu no ta trata di deprivacion. Pero mester tene cuenta hustamente cu e posicion di ambos grupo. Y esaki no por bay na un manera imponi. Tin mas aspectonan cu nos mester tene cuenta cu ne, ora nos ta papia di derecho humano, manera derecho di pueblo. Nos ta prepara pa sigui pensa den e direccion aki, esta cu nos tin di tene cuenta cu derechonan of sentimentonan di tur grupo den nos comunidad?

Amienda como caminda corecto?
Pa UPP ta importante pa bolbe infatisa, cual sea e forma cu e derecho aki lo wordo implementa, cu e ta wordo anticipa pa un proceso di un discusion nacional y profundo y cu pueblo ta wordo consulta y scucha. E caminda mas corecto ta keda e proceso di un ley, sea di parti di gobierno, of como ley di iniciativa. Esaki ta duna e oportunidad hustamente pa e discusion nacional y na mes momento ta duna nos oportunidad pa haci e investigacion necesario pa studia posibel impactonan y naturalmente cu consehonan necesario di instancianan, manera Raad van Advies.
Sra. de Sousa Croes ta mustra cu amienda ta e caminda mas facil ya cu por pasa e cambionan na momento cu e ley ya ta habri. UPP ta kere cu tratamento di ley mester tin su proceduranan, manera nos a pone aki riba caba. Un amienda ta mas bien pa corigi cierto aspectonan minimo den nos leynan, pero no por haci cambionan fundamental sin e procesonan democratico y legislativo. Cualkier "wetgevingsjurist" lo bisa cu e amienda aki tin un embergadura mucho grandi pa ser trata por medio di un amienda.

Consecuencia di “registracion di partner”
UPP ta keda para ariba cu no a dedica suficiente atencion na e posibel consecuencianan e.o. riba nos sistema di seguridad social. Nos a mustra riba e fenomeno di “schijnhuwelijk” cu por wordo amplia den “schijnregistratie”. Pero sigur tin mas, manera p.e. pa cu enseñanza.
Den nan reaccion tanto sra. de Sousa-Croes y sr. Lampe ta admiti cu lo bay tin problemanan y concecuencianan. Pero ambos ta sali for di e pensamento cu mester bin cu mas control, ya cu esaki lo mester ta parti di maneho. Nos ta conciente cu lo mester bin, tambe pa e “schijnhuwelijk” mihor sistema di control y tambe accion di parti di Openbare Ministerie ora constata esaki. E “schijnregistratie” ta bay haci cu mas hende lo por bay probecha di nos sistema di seguridad social. Pues mester midi kico ta implicacionan pa nos pueblo. Na momento cu ta amplia derechonan, esaki no por ta bay a costo di otro derechonan cu tey caba, manera derecho riba un pension pa asina, particularmente e parti di pueblo humilde por tin un entrada sigura y garantisa na momento cu nan no por traha mas.
Fuera di esaki mester tene na cuenta tambe e aspecto cultural di un pueblo cu ainda no ta na nivel libertino di comunidadnan occidental. Esaki tambe durante di e proceso di Oduber-Lammers, a keda enfatisa cu un otro no por impone sin mas un estilo di pensa y biba cu ta bay enpugna cu e cultura, norma y balor di un comunidad. Na momento cu bay impone esaki sin mas, sin duna espacio pa un discusion habri y sin tene cuenta cu emocionnan cu ta wordo crea y e presion di tempo, por bay hiba na un comunidad mas dividi y cu por tin consecuencianan cu mayan nos lo no kier carga.
Terminando UPP kier a mustra cu e direccion cu a percura pa hiba e discusion aki ta manera un “ongeleide projectiel”, cu enbes di a mustra di ta un discusion sensato, ta bay over na insulta otro y na mes momento ora argumento caba trata na bagatelisa e otro. E pregunta ta cu si ta esaki loke cu e Parlamentario en cuestion tabata anhela?


Lider di UPP
C.A.S.D. Wever
18 augustus 2016

Expresionnan haci den e articulo aki no necesariamente ta refleha opinion di ArenaPoliti.co