Evelyn Wever-Croes (MEP): Unda Mike Eman a keda den e discusion di amienda di union civil?
ORANJESTAD – Parlamento a trata e amienda di geregistreerd partnerschap cu sra Desiree Croes a presenta. Lider di MEP Evelyn Wever-Croes a expresa su lamento na prome lugar con e amienda aki a causa asina tanto dolor y disunion den nos pais. Esnan cu for di conviccion religioso ta contra e amienda a wordo insulta y yama pa ignorante. Esey no ta bon. Tampoco ta bon cu ta discrimina y stigmatisa un persona debi na su orientacion sexual. “Nos na Aruba ta conosi pa nos tolerancia, nos amabilidad, pero e amienda a saca e peor cara di Aruba. Mi kier mira nos bin bek como comunidad, caminda den respet mutuo y den dialogo nos ta sali di esaki. Mi ta conbensi cu bou un liderasgo fuerte y sincero, esaki ta posibel” Wever-Croes a bisa.
GOBIERNO A FAYA
Segun lider di MEP tabata un responsabilidad di gobierno pa carga un cambio asina grandi, y no mester a laga esaki pa un parlamentario carge practicamente su so. Pasobra ta gobierno so por a percura pa na prome lugar pa bin cu deliberacionnan nacional riba e tema aki. Pa hasi tur e estudionan cu ainda falta pa hasi, di e consequencianan di introduccion di matrimonio entre esnan di mesun sexo of union civil. Ta pesey nos a sostene e mocion na januari, den cual Parlamento unanimamente a instrui gobierno pa hasi un inventarisacion di e leynan y proceduranan cu ta contene discriminacion, sinembargo, gobierno no a hasi caso di e mocion aki.
Aki e eror mas grandi a wordo cometi: un gobierno cu a sconde pa su responsabilidad, cu no tabata tin e curashi pa atende cu e tema aki. Ni ora nan a wak con famianan tabata discuti cu otro, ni ora nan a wak e insultonan tabata cai na cada banda y di cada banda. Ni e ora Gobierno a tuma rienda. Cualquier gobierno cu ta respeta su mes, lo a tuma rienda, lamentablemente nos no tin un gobierno asina na Aruba.
CONFUSION
“Probablemente ta pesey ainda tin hopi confusion kiko e amienda ta, pasobra ningun hende a duna informacion debido. E hecho cu a traha prome un amienda pa cambia e instituto di matrimonio, y apenas algun dia pasa a cambie pa union civil, tampoco a yuda den e discussion, especialmente ora esnan cu a entrega e amienda pa regla matrimonio di mesun sexo den articulo 31, a declara cu nunca tabata nan intencion pa mishi cu e instituto di matrimonio. Esey a crea hopi confusion y desconfiansa. Y probablemente pesey tabata tin accionnan di parti di comunidad Catolico y Cristian, y di e LGBT community, hopi basa riba informacion INCORECTO cu a wordo difundi.
Y awor cu e amienda ta dewn discussion, tur hende ta wak direccion di Parlamento pa soluciona e confusion. Hasta gobierno! Siendo cu ta tarea di Gobierno e ta. Ministernan Eman, Oduber y Hooiboer a expresa cu nan ta sostene. Pero ta nan ta gobierno! Nan mester a regle, y nan por a regle si di berdad nan tabata kier. Pero e realidad ta cu gobierno no kier a hasi’e, y a prefer laga henter un comunidad pleita cu otro. Gobierno di Mike Eman a faya un biaha mas” segun Evelyn Wever-Croes.
Expresionnan haci den e articulo aki no necesariamente ta refleha opinion di ArenaPoliti.co