MATRIMONIO TA KEDA INSTITUTO ENTRE HOMBER Y MUHER. 

ORANJESTAD – “MEP no por sostene e amienda manera cu e ta, pasobra e procedura cu e amienda a cana no ta corecto. Un ley di e embargadura aki mester cana e procedura di un ley y no amienda. E mester ta un ley cu gobierno ta prepara. Si Gobierno no kier of ta tarda, e por ta un ley di iniciativa di Parlamento, cu ta wordo carga pa henter Aruba. Un ley asina importante mester cana su caminda di consulta cu tur esnan envolvi. Prome cu un ley di e embargadura aki yega Parlamento, e mester a haya consehonan di institutonan di conseho di gobierno y parlamento con lo regla e posicion di esnan cu a biba den concubinato duradero, cu yiunan.

Tin hende cu ta haya cu esaki no ta un argumento valido, mi ta respeta opinion di tur hende, pero mi ta spera cu por respeta nos trabou tambe. Nos ta parlamentario y legislador, y si nos no observa e reglanan formal pa traha ley, nos ta neglishando nos responsabilidad. Prome cu bin cualquier ley riba mesa Gobierno mester cuminsa cu estudionan y consulta pa introduccion di un eventual union civil na Aruba, den un titulo separa di esun di matrimonio. Mester consulta cu instancianan manera SVB, fondonan di pensioen, bevolking pa prepara e ley bon, pero mas importante mester informa pueblo. Den un consulta nacional mester atende cu un tema asina importante y delicado, den cual e respet mutuo mester prevalese. Mi sa cu esaki por tuma su tempo, pero ta necesario pa tuma tempo pa hasi algo bon.

‘EQUAL RIGHTS’ pero THE RIGHT WAY
Mientras tanto, nos mester atende cu e inquietudnan cu ta biba den e LGBT community. Mi mes conose personanan lew y cerca cu tin otro orientacion sexual. Mi ta stima nan y mi ta mira cu nan tin cierto inquietudnan, cu mester ser adresa, pasobra nan tambe tin derecho mescos cu tur cuidadano na Aruba, di tin un bon biba, y di ta felis. Los di e discusion tocante matrimonio entre personanan di mesun sexo, of union civil, tin algun aspecto cu mester haya atencion AWOR. Ta trata di parehanan cu ta biba cu otro, y cu kier cuida otro bon, y mas y mas pareha ta scohe awendia pa biba cu otro en bes di casa, cual tin consequencia pa nan y/of nan yiunan. Un ehempel ta pareha A y B ta companja 30 anja cu otro, A bira malo, Hospital awor no ta reconose B como su pareha pa tuma decision p’e; esaki ta algo cu no ta bon, y por wordo regla den protocolnan di Hospital. Otro ehempel ta si pareha A y B a companja 20 anja cu otro, A a keda cas semper wak pa e yiunan y e hogar, mientras B a traha; si nan separa A ta keda desampara; esaki ta algo cu no ta husto (irespecto ki sexo nan ta), y mester wordo regla den leynan cu ta regla cuido y alimentacion. Algun di e inquietudnan aki por wordo soluciona na forma bastante sensiyo, SIN mishi e instituto di matrimonio. Asina bo ta yega na e punto di derecho igual mas liher y mas efectivamente. MEP ta atendiendo cu e punto aki, y lo presenta mocion y amienda pa logra mas trato igual den e varios leynan durante e reunion cu ta continua dialuna awor” lider di MEP Evelyn Wever-Croes a duna di conose.

Expresionnan haci den e articulo aki no necesariamente ta refleha opinion di ArenaPoliti.co