Den e articulo aki ArenaPoliti.co ta trata e pregunta si e ley di CAft ta un solucion duradero, y si ta bale la pena pa nos entrega nos autonomia financiero na Hulanda. E ley di CAft lo wordo trata den Parlamento di Aruba mayan (27 di augustus 2015).

Quick fix 
Entregando nos autonomia financiero y cay bou di supervision di Hulanda via CAft, segun hopi ta un solucion pa diferente problema. Cua problema? Ta depende ken bo puntra; ‘e situacion financiero desastroso’, ‘corupcion’, ‘friends & family’ (vriendjespolitiek), ‘iresponsabilidad’, ‘incapacidad’, of ‘falta di experticio’. Tambe tin esnan cu lo bisa ‘niun problema paso tur cos ta bon’. Loke hopi no ta realisa ta cu e ley di CAft ta mas bien un quick fix y no un solucion structural y duradero.

Cambionan necesario cu si ta structural y duradero, ta si Aruba bin cu leynan nobo enserando reglanan di good governance, un Ley di Comptabilidad nobo, un ley di financiamento di partido politico, y mas checks and balances. Tambe por pensa riba cambionan den nos sistema electoral y gubernamental pa haci Parlamento funciona mas efectivo y independiente. Asina sigur tin mas ideanan cu ta trece cambio structural y duradero, sin entrega nos autonomia financiero.

E ley di CAft ta menciona ni un di esakinan. Loke si ta wordo menciona den articulo 14 ta rekisitionan den forma di cifras cu internacionalmente ta mustra bunita pa tanto Aruba como e ‘Koninkrijk der Nederlanden’: “Voor het Land bedraagt het tekort voor het begrotingsjaar 2015 maximaal 3,7% van het BBP, in 2016 maximaal 2,0%, in 2017 0,5%, met in 2018 een overschot van minimaal 0,5%.”
E interes di Hulanda den con Aruba tin cu yega na e cifranan aki ta mustra di ta minimal. Kinan e ley ta laga espacio pa Gobierno di Aruba, e mesun gobierno cu ta manehando nos finansas pa casi 6 aña caba, dicidi den cua gasto ta wordo corta, y/of cua medidanan mas lo wordo introduci pa por yega na e cifranan menciona den articulo 14. Y e ley no ta obliga Gobierno di bin cu leynan di good governance. Gobierno y Hulanda ta bypass e ciudadano Arubiano door di no a duna Pueblo e oportunidad pa vocifera su opinion por medio di un referendum, mescos cu a bypass Parlamento (representante di Pueblo) den e protocol di 2 mei 2015. Pa colmo sin un referendum pa consulta cu Pueblo riba algo asina impactante.

Tur esaki ta duna indicacionnan cu e ley di CAft ta un lose-lose situation pa Pueblo di Aruba, considerando cu Aruba ta perde autonomia financiero, sin e beneficio di un solucion duradero. Pero pa Gabinete Mike Eman II y Gobierno Hulandes e ta un win-win situation, considerando cu Gabinete Mike Eman II ta evita un otro KB y/of un Algemene Maatregel van Rijksbestuur, y Hulanda ta haya loke nan tawata kier pa basta aña caba; supervisa finansas di Aruba, y evita e berguensa pa reino Hulandes di si Aruba bira e siguiente Grecia of Puerto Rico (financieramente). Naturalmente Pueblo Arubano tampoco kier pa nos pais bay bancarota, pero entrega nos autonomia financiero no ta necesario pa preveni cu Aruba lo bay bancarota.

Banda di esey, no por ignora cu ora bo entrega bo autonomia na un otro, bo mester ta hopi sigur cu esun cu ta bay dicidi pa’bo, tin bo interes na pecho. Den e caso aki nos lo mester confia cu Hulanda ta pone e interesnan di e Pueblo Arubano na prome luga, y no e interesnan di Hulanda, of di Gobierno. E entrega di autonomia tambe ta un ‘brevet van onvermogen’, basicamente bisando cu “Aruba mes no por, laga Hulanda haya e ‘laatste woord’.” Especialmente considerando cu Aruba mes ta entrega su autonomia, despues di a haye na 1986 cu Aruba su Status Aparte.

Ademas, si Parlamento aproba e ley di CAft, e hecho cu tanto Gobierno y Parlamento di Aruba mes a bay di acuerdo, ta haci hopi mas dificil pa Aruba bringa un decision di Hulanda cu ta contra bienestar/interes di nos pais. Na aña 2014 prome minister Mike Eman a bisa cu e lo bay United Nations pa reclama Hulanda, tempo cu gobernador no a firma presupuesto. Imagina’bo si Gobierno lo mester defende Pueblo contra un decision di Hulanda, internacionalmente, pero Gobierno y Parlamento di Aruba mes a duna Hulanda e autoridad di tuma e decision ey.

Mensahero
Ta wordo bisa cu CAft ta simplemente check si Aruba ta cumpli cu cierto norma, y cu toch tin un Arubiano aden tambe. Cu Gobierno di Aruba por nombra un (1) di e tres miembronan ta berdad, pero e otro dos miembronan ta wordo nombra door di Hulanda, y Gobierno di Reino(=Hulanda). E hecho cu tin un desbalansa di 2 pa 1 den e structura di CAft, y cu Hulanda a nombra sr. Age Bakker, e presidente di Cft, como e presidente si CAft, ta indica claramente cu Aruba ta subordina den control di su propio finansas. E hecho cu Aruba por nombra un miembro, ta leu di haci suficiente pa no papia di un entrega di nos autonomia financiero. Tur esaki ta haci cu ratificacion di CAft ta pone preto riba blanco cu, apesar cu e opinion di Gobierno di Aruba por wordo considera, na final di dia Hulanda ta 'baas den nos cas'.

Cu CAft no por duna un aanwijzing, ta berdad. CAft ta contola si Gobierno di Aruba ta cumpli cu normanan, y ta duna Gobierno di Aruba ‘conseho’. CAft tambe ta raporta tur cos bek na Hulanda, y por recomenda Hulanda pa duna Aruba un of mas aanwijzing. Den hopi aspecto, CAft ta un ' mensahero experto' pa Gobierno Hulandes. Ni Aruba, ni CAft lo tin e ultimo palabra, Gobierno Hulandes lo tin esey. Un conseho di CAft pa duna Aruba un aanwijzing lo haci e proceso di duna un aanwijzing mas facil, pero esun cu ta tuma e decision final ta Gobierno Hulandes.
E menasa continuo di un aanwijzing (articulo 12, 13, 15, 18, 20 di e ley di CAft, y protocol di 2 mei 2015) ta enfatisa e perdida di autonomia financiero.

“Otro pais tambe tin supervision, e ta algo bon.”
Entre otro parlamentario Rene Herdé (AVP) a vocifera cu hopi pais ta cay bou di un forma di supervision financiero, y cu segun IMF, e paisnan aki financieramente ta funciona miho cu otronan. A wordo mencona cu “hasta Hulanda” ta cay bou di supervision financiero. Pero un diferencia grandi cu e situacion di Aruba ta cu Aruba lo cay bou di supervision di un otro pais, mientras cu, por ehempel, Hulanda ta cay bou di un forma di supervision di institutonan di Union Europeo (European System of Financial Supervision). Supervision cu e meta pa tene e Euro y e economia di Union Europeo stabiel. E ta algo cu Hulanda (y otro miembro di EU) ta haci, y a cambio por keda miembro di EU, algo cu e paisnan en cuestion mes kier pa motibo di cierto beneficionan, y ta un supervicion necesario pa ora bo ta comparti e mesun moneda (€) cu tanto otro pais. E ekivalente di un ley di CAft pa Hulanda lo ta si Hulanda bisa; “ban entrega nos autonomia financiero na un otro pais y laga e pais ey haya e ultimo palabra pa loke ta trata nos placa”. Bo por imagina’bo cu Eerste y Tweede Kamer (Parlamento Hulandes) aproba algo asina, y hasta laga nan gobierno pone nan ‘buiten spel’ cu un protocol y un ley?

Den e caso di Aruba, ta supervision di un otro pais (Hulanda) riba Aruba, y e beneficio pa Aruba no tin di haber cu un shared economy. E beneficio ta cu Gabinete Mike Eman II no ta haya un (otro) KB of AMvRB, y si no cumpli cu e rekisitonan, toch por haya un aanwijzing. Ken ta dicidi si Aruba a cumpli? Hulanda. Hasta cu cifranan defini, keto bay ta Hulanda tin e palabra final. Por ehempel, despues cu Cft a investiga presupuesto di Aruba, nan a yega na otro cifra di debe compara cu loke Gobierno tawata tin poni (debt to GDP ratio). Y e cifra cu Cft a yega na dje, ta esun cu nan a usa pa duna nan “conseho”.

Fiscal council
Un meta di e ley ta cu, dia Aruba logra yega na e rekisito di un balanced budget duradero cu un surplus di minimal 0,5%, Aruba lo haya un fiscal council cu lo reemplasa CAft. Esaki ta indica cu, si Aruba logra cu e rekisitonan, CAft lo t'ey pa un tempo limita. Loke lo bin despues, lo mester ta un fiscal council*, crea “in samenwerking met Nederland”. Tambe ta wordo menciona den e Memorie van Toelichting di e ley di CAft cu e intencion di Gobierno ta pa laga e fiscal council cay bou di Raad van Advies den un of otro forma.

Loke sigur lo a duna mas siguransa, ta si e ley lo a contene un articulo cu explicitamente ta indica e fin di e supervision financiero di Hulanda riba Aruba, dunando e siguransa cu Aruba lo haya su autonomia financiero bek.
Mientras cu ta papia di un fiscal council bou di Raad van Advies como un meta di e ley, pa añas Gobierno na hopi ocasion ta pone consehonan di nos propio organonan manera Raad van Advies y Algemene Rekenkamer un banda.

Bale la pena?
Tin hopi Arubiano cu ta di opinion cu; "den 30 aña di Status Aparte, gobernantenan a haci y deshaci cu placa di Pueblo, na beneficio propio y di friends & family. Nan a demostra di ta incapaz di maneha nos finansas drechi. E ora a yega pa entrega nos autonomia financiero na Hulanda, y laga nan pone 'zaken op orde'." Di otro banda tin cu considera e balor di nos autonomia, e downside di laga un otro tuma decisionnan pa nos, y si en berdad CAft ta e solucion pa yega na finansas sostenibel duradero.

Expresionnan haci den e articulo aki no necesariamente ta refleha opinion di ArenaPoliti.co