Ultimo dianan por a lesa basta articulo y comentario tocante e conseho di Raad van State di 17 september 2015. E conseho a bin despues cu Tweede Kamer (Parlamento Hulandes) a puntra pa esaki (8 april 2015). Parlamentonan di Aruba, Corsou y Sint Maarten tambe a expresa e deseo di un conseho di Raad van State y a contribui na e preguntanan haci na Raad van State. Den e conseho, e departamento di conseho di Raad van State a duna splicacion tocante dunamento di aanwijzing (KB) door di Gobierno di Reino (Hulanda) na gobernadornan di Aruba, Corsou y Sint Maarten.

Mientras cu Raad van State no a wordo puntra directamente si e KB cu Aruba a haya na 2014 tawata legitimo, por conclui for di e splicacion di Raad van State cu e contenido cu e KB a haya, y e proceso cu Hulanda a sigui den duna e KB, no ta corecto. Pone Gobernador "wanta" cu firmamento di presupuesto por medio di un KB no ta corecto. Loke si por, ta cu enbes di "wanta" cu e firmamento, anula (vernietig) e presupuesto por completo via un KB. Durante e proceso di vernietiging por "wanta" (schors) firmamento, pero cu intencion di vernietiging. Ley ta obliga Gobierno di Reino pa laga Raad van State duna su conseho durante e procesonan aki. Cu e KB di aña pasa, Gobierno di Reino a usa e medida di KB eroneamente, y no a pidi Raad van State pa conseho.
Un otro opcion enbes di un aanwijzing tawata un Algemene Maatregel van Rijksbestuur (AMvRB), cu ta un medida mas pisa cu un aanwijzing. Un AMvRB tambe tin su proceso y rekisitonan prome cu e por wordo duna y ehecuta.

Conseho, no veredicto
Mester nota cu e conseho di Raad van State no ta un veredicto cu ta dicta cu consecuencia huridico obligatorio. Raad van State ta e organo di conseho mas halto den Reino Hulandes, y tin un departamento di conseho (Afdeling advisering) y un departamento cu ta duna veredicto (Afdeling bestuursrechtspraak). Den e caso aki ta trata di un conseho di Afdeling advisering. Raad van State (Afdeling bestuursrechtspraak) no tin e autoridad pa duna veredicto riba e conflicto di e KB.

Por a nota varios reaccion di politico, medio di comunicacion y otro ciudadano, bisando entre otro cu prome minister Mike Eman a haya rason, of cu no ta importante si e KB tawata legal of no.

Pakico e conseho di Raad van State ta importante
Pa esnan cu ta balora nos autonomia, sin duda e conseho di Raad van State ta relevante. Segun Raad van State, Hulanda a faya den e manera cu a trata cu presupuesto 2014. Aunke e conseho no tin consecuencia obligatorio, e ta un "aviso" pa Gobienro Hulandes pa no ripiti e fayo aki. Aruba, y tambe e otro islanan den Reino Hulandes, no tin un posicion igual cu Hulanda dentro di Reino Hulandes. Ta importante pa e islanan vigila y defende e autonomia cu nan tin, y no permiti Hulanda "trapa" riba e derechonan regla den Statuut di Reino y Constitucionnan di Aruba, Corsou y Sint Maarten. Especialmente mientras cu no tin un geschillenregeling pa e conflictonan aki riba nivel di Reino, no mester ignora ora Raad van State duna un conseho al caso.

Pakico e conseho no ta importante
Na mesun momento e conseho su importancia no ta bay mas leu cu afecta e proceso y enfatisa e reglanan cu mester tene na cuenta ora di duna un aanwijzing. Cu Gobierno Hulandes a faya cu e contenido y proceso di e KB, no kiermen cu no tawata tin base pa Hulanda duna un KB. E conseho no kiermen cu diripiente Aruba su situacion financiero na 2014 tawata bon.

E conseho tampoco ta cambia cu nos a perde parti di nos autonomia financiero cu e ley di CAft. E decision ey no a bin por medio di un KB, ni un AMvRB. Gabinete Mike Eman mes a negocia cu Hulanda y firma protocolnan, y despues Parlamento di Aruba den e reunion di 27 augustus 2015 mes a aproba esaki cu 13 voto pro (AVP) y 8 contra (MEP, PDR).

Prome Minister Mike Eman a haya rason cu su welga di hamber?
Sr. Mike Eman a bay den welga di hamber ora Gobernador no a firma presuesto 2014, y a bisa cu e ta dispuesto pa muri pa defende autonomia di Aruba y no lo entrega ni un centimeter di autonomia. Sr. Eman tambe a expresa cu loke Hulanda ta haciendo no ta corecto. Pa loke ta trata e pregunta si Hulanda a sigui e proceso corecto, por conclui cu Raad van State ta duna sr. Mike Eman rason. Pa loke ta trata e pregunta si Aruba su situacion financiero tawata un motibo valido pa un KB (cu ta cumpli cu ley), no por conclui cu Raad van State ta duna sr. Mike Eman rason. E conseho di Raad van State no ta bay den detayes specifico di e sucedidonan di presuesto 2014. Pa loke ta trata nos autonomia; esey a wordo afecta cu e protocol cu ministernan Mike Eman y Angel Bermudez a firma cu Hulanda (2 mei 2015), hunto cu e aprobacion di e ley di CAft den Parlamento di Aruba. E conseho di Raad van State no ta trata e ley di CAft, ni e protocol di 2 mei 2015.

E aspectonan diferente aki por splica e reaccionnan diferente tocante e conseho di Raad van State. Di un banda mester wak e balor y importancia di e conseho, y di otro banda no mester duna e conseho mas balor y importancia cu e tin.

Expresionnan haci den e articulo aki no necesariamente ta refleha opinion di ArenaPoliti.co