Perspectiva Independiente without background 001

Referendum Consultativo: Algo pa Aruba?

160405 referendum
Dia 6 di april 2016 e prome referendum a base di e Wet raadgevend referendum lo tuma luga na Hulanda, Boneiro, Saba y Sint Eustatius. Votadonan lo por vota na fabor of contra di un tratado entre Union Europeo y Ucrania. E ley Hulandes cu ta haci e referendum consultativo posibel ta na vigor desde 1 di juli 2015.

E ley ta crea e posibilidad pa ciudadanonan inicia un referendum consultativo pa pueblo por vocifera su opinion riba un ley cu a wordo aproba door di parlamento. E hecho cu ta trata di leynan cu a wordo aproba caba (pero no necesariamente ta na vigor ainda) ta duna e referendum un caracter corectivo. Cierto ley ta exclui di e posibilidad di un referendum, por ehempel ley di presupuesto y ley cu ta concerni e monarkia.

Con ciudadano ta inicia un referendum?
E proceso pa inicia un referendum consultativo na Hulanda ta cuminsa cu un peticion introductorio, cual ta encera cu dentro di cuatro siman despues cu un ley referendabel wordo publica, mester di por lo menos 10.000 firma di persona cu derecho di voto.
Si e peticion introductorio ta exitoso, e peticion definitivo por inicia. Den e fase definitivo, cu ta un maximo di 6 siman, mester di por lo menos 300.000 firma di persona cu derecho di voto. Si e peticion definitivo ta exitoso, un comision independiente ta stipula un fecha pa e referendum consultativo tuma luga.

Kico gobierno y parlamento ta haci cu e resultado?
Segun e ley Hulandes, pa haci e referendum valido, por lo menos 30% di esnan cu derecho di voto mester vota. Si menos cu 30% participa, e resultado no ta valido y e ley en cuestion por bay na vigor.
Si por lo menos 30% participa, y un mayoria vota na fabor di e ley en cuestion, e ley por bay na vigor.

Den e caso cu por lo menos 30% di esnan cu derecho di voto participa, y un mayoria vota contra, e resultado ta wordo considera como un conseho negativo di pueblo pa e ley en cuestion. Gobierno y parlamento lo mester dicidi si lo sigui e conseho, of si lo pone e resultado un banda y sigui cu implementacion di e ley referendabel. Gobierno mester sea entrega  un concepto di ley pa retira e ley en cuestion, of entrega un concepto di ley pa laga e ley en cuestion bay na vigor. Pues parlamento lo vota ‘di nobo’ riba implementacion di e ley.
160405 yes no
Presion consultativo
Apesar cu e resultado ta wordo considera un conseho y gobierno no ta obliga di cumpli cu e conseho di pueblo aki, e referendum por tin influencia den practica. Por ehempel, si participacion ta 70%, for di cual 80% a vota contra, e presion riba gobierno y parlamento pa retira e ley lo ta grandi. Pero si participacion ta 35%, for di cual 55% vota contra, no lo ta straño si gobierno no cumpli cu e resultado.

Pa e referendum di 6 di april 2016, diferente partido cu representacion den Tweede Kamer (parlamento Hulandes) a laga sa di antemano cu nan lo vota di acuerdo cu e resultado (valido) di e referendum.

Un otro manera cu e posibilidad di un referendum ta influencia gobierno su maneho, ta cu gobierno lo tene mas cuenta cu e deseo di pueblo ‘di antemano’ ora di manda concepto di ley pa parlamento, pa asina purba preveni cu lo tin suficiente interes (firma) pa inicia un referendum. Motibonan cu un gobierno lo kier preveni un referendum ta pa preveni tur e gastonan di un referendum, pa preveni di mester “campaña” pa purba convence votadonan pa vota na fabor, pa preveni posponemento di un ley, y pa no tuma e riesgo di un resultado ‘negativo’.

Algo pa Aruba?
Imagina’bo si, por ehempel, 12.500 firma lo percura pa un referendum aki na Aruba, den cua pueblo por vocifera su opinion riba un ley, dunando gobierno y parlamento un manera pa haya sa cuanto sosten un ley tin.
Tin diferente argumento contra crea e posibilidad aki. Por ehempel, no mester ta e intencion cu tin un referendum ‘cada rato’ pa cualkier ley. Pero esaki lo por wordo preveni door di stipula un cantidad adecua di firma necesario, un porcentahe di participacion adecua pa haci e resultado valido, y tambe por exclui cierto ley di ta referendabel. Pa Aruba, e drempel di cantidad di firma lo mester ta relativamente (hopi) mas halto cu na Hulanda, mientras cu tambe tin argumento pa haci e drempel di participacion un porcentahe mas halto tambe. Esaki tambe lo yuda preveni abuso y mal uso di e posibilidad di inicia un referendum.

Kisas e miho argumento pa bin cu algo similar na Aruba, ta cu e ta un forma mas directo di democracia. Ora pueblo ta considera un ley suficiente importante y cuestionabel, pueblo ta haya e oportunidad pa vota pro of contra e ley, mientras cu ministernan y parlamentarionan ta haya e oportunidad pa haya sa kico pueblo kier. 

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.