Perspectiva Independiente without background 001

Minister Otmar Oduber no kier divulga documento na Parlamento

otmar all inclusive
Pa basta tempo caba parlamentarionan di MEP y PDR ta reclama cu minister Otmar Oduber no kier duna Parlamento un ‘rapport’ di PWC relaciona cu hotelnan all-inclusive. AHATA tambe a reclama, referiendo na e rapport como “e mystery report di PWC.”

E relevancia di e ‘rapport’ tin di haber cu e concepto di ley di minister Oduber pa regula e cantidad di (camber di) hotel all-inclusive na Aruba. E sospecho di e parlamentarionan di oposicion ta cu minister Oduber no kier comparti e rapport pa motibo di contenido cu no ta sostene e ley cu e kier Parlamento aproba.

Un synopsis di PWC, cu minister Oduber a duna Parlamento, ta inclui evaluacionnan cu ta sostene e plan di minister Oduber, pero tambe evaluacionnan cu no ta sostene e plan di minister Oduber. Por ehempel, e synopsis ta duna e siguiente assessment: “Considering the apparent broad footprint of the all-inclusive model in Aruba, combined with the momentum of consumer preference, operators’ available investment funds, the expected entry of established traditional brands, it may be advisable to embrace the all-inclusive concept.”

E synopsis tambe ta referi na diferente rapport cu PWC a usa pa e synopsis, incluyendo un rapport cu segun oposicion ta e rapport cu minister Oduber no kier divulga.

Con cu bo kier yam’e
Tratamento di e ley den Parlamento a inicia awe (19 di augustus 2016). E reunion a cuminsa cu un punto di ordo di lider di fraccion di MEP Evelyn Wever-Croes, puntrando pa e rapport di PWC. Minister Oduber na su turno a laga sa cu Parlamento a haya ‘e rapport di PWC’ caba, referiendo na e synopsis. Sr. Oduber a bisa cu “no ta existi un rapport pa mi dunabo” y cu “no ta existi ningun otro rapport.” Pues ta mustra cu loke minister Oduber tawata referi na dje den Parlamento y tambe den prensa ora di bisa cu Parlamento a haya ‘e rapport di PWC’ caba, ta e ‘synopsis di PWC’. Un ehempel ta e comunicado di prensa di su ministerio den cua ta menciona cu “e SWOT analisis di e raport di Banco Central pa cu all inclusive ta pa un 95% den liña cu esun di PWC cu a wordo entrega na Parlamento…”

Bek pa awemainta den Parlamento. Un wega di palabra a sigui, cu minister Oduber bisando cu e synopsis ta e rapport, y cu loke tin prome cu esey [cu PWC a usa pa e synopsis] ta un “draft,” un “documento no-oficial.” Parlamentario Andin Bikker (PDR), referiendo na e Wet Openbaarheid van Bestuur, a bisa cu Parlamento tin derecho di haya e documento for di e minister, sin importa si ta un draft. Segun Bikker, “si Gobierno tin’e, nos [Parlamento] tin derecho riba dje.” Presidente di Parlamento Marisol Lopez-Tromp a splica cu e esencia di e peticion ta cu e hecho cu e documento cu ta wordo referi na dje ta inconclusivo no ta un motibo pa no duna Parlamento e documento. Sra. Lopez-Tromp a bisa minister Otmar Oduber cu sea e ta un draft, un documento formal of no, e peticion a wordo haci na e minister pa comparti e documento. Minister Oduber a ripiti cu e documento no ta oficial. Loke a falta ta argumentonan valido di minister Oduber pa no comparti e documento cu Parlamento. E minister ta keda referi na e synopsis, comosifuera cu esey ta hustifica cu e no ta divulga e documento cu MEP y PDR a pidi.
otmarquote caracteristica
Transparencia
Mientras cu nos no tin e documento pa por evalua si en berdad e ta contene conclucionnan cu no ta sostene e concepto di ley di minister Oduber, nos por conclui cu e documento, rapport, draft of con cu bo kier yam’e ta existi, y cu minister Oduber conscientemente no ta divulga esaki na Parlamento, cual ta nos organo di mas halto cu e tarea di controla Gobierno (ministernan). Un falta di transparencia, acompaña pa un wega di palabra, for di un minister cu a bisa cu transparencia semper tabata, ta y lo sigui ta un caracteristica di su persona. Tempo lo mustra si minister Oduber por cumpli cu e caracteristica cu e ta atribui na su mes.

Mientrastanto parlamentarionan di fraccion AVP no ta sostene parlamentarionan di oposicion cu nan peticion pa por haya e documento, asina permitiendo e minister di actua contra reglanan di Good Governance. Desafortunadamente nos no por bisa cu e falta di transparencia den gobernacion aki ta algo straño na Aruba. Un practica cu consecuencianan negativo pa loke ta trata gobernacion di nos pais. Especialmente ora un mayoria den Parlamento permiti esaki, continuamente lagando ministernan ‘get away’ sin cumpli cu leynan di transparencia.


Por wak e peticion y intercambio cu minister Otmar Oduber na cuminsamento di e reunion publico di 19 di augustus 2016 via e website di Parlamento di Aruba (link: video reunion publico).

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.