Perspectiva Independiente without background 001

Clarificacion di e confusion cu e amienda pa regla Union Civil

codigo civil
Keto bay tin confusion bou di hopi hende pa loke ta trata e intencion di e amienda di parlamentario de Sousa-Croes. Sra. de Sousa-Croes a entrega un amienda dia 5 di juli 2016, y un version nobo dia 17 di augustus 2016. E parlamentario a bisa cu ambos version di e amienda ta trata introduccion di union civil entre persona di mesun sexo y persona di diferente sexo, y no matrimonio homosexual. Diferente politico y persona den comunicadad a expresa cu, pa loke ta trata e amienda inicial di 5 di juli 2016, esaki no ta cuadra. Un motibo di e confusion ta un cambio cu e amienda inicial ta propone.

E amienda di 5 di juli ta propone pa cambia e articulo aki:
‘Een huwelijk wordt alleen aangegaan tussen een man en een vrouw die beiden de leeftijd van achttien jaren hebben bereikt.’
den:
‘Een huwelijk wordt alleen aangegaan tussen personen die beiden de leeftijd van achttien jaren hebben bereikt.’

Riba su mes e cambio aki ta mustra di haci matrimonio homosexual posibel. Pero no necesariamente si lesa y interpreta un otro articulo. Asina e amienda di 5 di juli ta laga e articulo aki intacto:
‘De man kan tegelijkertijd slechts met één vrouw, de vrouw slechts met één man door het huwelijk verbonden zijn.’
Den e toelichting di e amienda tambe ta wordo splica cu for di e articulo aki por conclui cu matrimonio ta keda entre un homber y un muhe. 

Loke por cuestiona ta si e escogencia pa e manera pa haci e wetswijziging ta esun miho. Facilmente por a haci e cambio den un forma mas cla, cual ta deseabel, especialmente ora ta trata di un topico manera esaki. Tambe mester tene na cuenta e principionan di bon gobernacion cu ta inclui cu leynan mester ta duidelijk y ondubbelzinnig. Por bisa cu e amienda di 5 di juli ta ‘ongelukkig geformuleerd’ y strategicamente no optimal pa logra su meta. Pero tumando na cuenta e toelichting di e amienda, por conclui cu e intencion di e amienda inicial no ta pa introduci matrimonio entre pareha di mesun sexo. 

Amienda nobo
Mientrastanto parlamentario de Sousa-Croes a trek in su amienda di 5 di juli, y a entrega e version nobo dia 17 di augustus 2016. Un version cu no ta inclui e cambio di ‘tussen een man en een vrouw’ pa ‘tussen personen’ y ta menciona explicitamente cu ‘Het huwelijk kan alleen worden aangegaan tussen een man en een vrouw.’

Desafortunadamente e confusion inicial a stroba pa yega na un discusion publico sano, mientras cu e discusion ya caba tawata leu di ta uno sano. Keto bay e confusion ta hunga un rol y e nivel di e discusion ta laga hopi di desea. Durante tratamento di ley pa regula e cantidad di camber di hotelnan all-inclusive (19 di augustus 2016) sra. de Sousa-Croes na dos ocasion a pidi punto di ordo durante cual ela bisa cu parlamentarionan di oposicion no a compronde su amienda di 5 di juli, y ta puntra si nan lo compronde amiendanan cu lo wordo entrega relaciona cu e ley di all-inclusive. Segun de Sousa-Croes tin parlamentarionan “cu no por compronde un amienda di 7 siman.”


Recientemente sra. de Sousa-Croes tambe a duna ArenaPoliti.co e siguiente splicacion: “E amienda tabata for di principio pa introduci Geregistreerd Partnerschap den nos Codico civil. Como cu den e prome version di dia 5 di juli 2016 algun persona mal informa, y cu no a lesa e amienda bon y/of tin miedo cu e amienda ta introduci matrimonio homosexual, mi a ripiti den e version mas nobo di mi amienda cu matrimonio ta keda entre homber cu muher.”


Caminda ta sera pa matrimonio homosexual?
Recientemente lider di fraccion di AVP Rene Herdé a elabora riba e version nobo di e amienda. Cierto interpretacion di algun expresion di sr. Herdé a trece un poco confusion riba e posibilidad di matrimonio homosexual (den futuro).
Referiendo na e preocupacion di lidernan religioso pa e instituto di matrimonio keda uno entre un homber y un muhe, Herdé a bisa cu e version nobo di e amienda “lo sigura cu esey ta keda asina.” 
Esaki por a crea e imprecion cu e amienda ta bay preveni matrimonio entre pareha di mesun sexo, mientras cu hopi persona, tanto pro y contra e amienda, tin e imprecion cu e amienda ta un paso den direccion pa legalisa matrimonio entre pareha di mesun sexo den futuro, of a lo menos no ta preveni esaki.

Sra. de Sousa-Croes ta clarifica y ripiti su meta: “Esaki [cambio den version nobo di amienda] no ta nifica cu ta sera caminda pa matrimonio homosexual den futuro. Esey semper lo ta posibel y lo ta den man di e generacion di politiconan di futuro. Un ley semper por wordo cambia.
Loke mi kier a logra ta kita e desigualdad cu ta existi den nos leynan pa cu e comunidad lgbt. Si mi amienda wordo aproba ya nos tin por lo menos e posibilidad di formalisa nos relacion.
Loke e version nobo di mi amienda berdad ta haci ta confirma cu pa aña 2016 matrimonio lo keda entre homber cu muher.
Si esaki mester duna pa logra un poco di igualdad na Aruba na aña 2016, mi por biba cu ne. Tur cos bon ta tuma su tempo.”


Amienda vs. Ley di Iniciativa
Un otro diferencia di opinion ta e punto di bista cu introduccion di union civil manera e amienda ta propone no mester purba wordo pasa via un amienda durante tratamento di un codigo civil nobo (cu ta un ley grandi cu ta encera hopi cambio), pero por medio di un ley di iniciativa, asina incluyendo entre otro Raad van Advies den e proceso legislativo. Pa mas tocante esaki, klik aki pa lesa reaccionnan di Dèsirée de Sousa-Croes y Rudy Lampe riba 3 argumento contra e amienda di geregistreerd partnerschap.


Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.