A base di e investigacion y sospechonan contra minister di asuntonan social, hubentud y labor, Paul Croes, e minister a opta pa tuma ausencia pa un periodo defini y traspasa responsabilidadnan diario di su carteranan pa minister Angel Bermudez. Sr. Paul Croes no a entrega su retiro como minister. 

“Mi a haci un peticion na conseho di minister pa un periodo di ausencia. Pa motibo cu e caso aki, na momentonan aki, no ta duna'mi e espacio pa por continua cu e trabounan.” — Paul Croes

Conseho di minister di gabinete Mike Eman II a acepta e peticion aki. Prome minister Mike Eman a gradici comunidad pa sosten y apoyo pa minister Paul Croes, y tin tur siguransa y fe cu lo surpasa e situacion en cuestion.

Den e declaracion di ministernan Paul Croes y Mike Eman no a menciona te ki dia e ausencia pa un periodo defini ta valido. E ministernan a opta pa duna un declaracion sin presencia di prensa en general pa por haci pregunta. 


Reaccion di politico riba e investigacion:

• Booshi Wever (UPP): Otro prueba cu introduccion di reglanan estricto di Good Governance ta indespensabel!
• Evelyn Wever-Croes (MEP): Si e leynan cu MEP ta lucha p’e a pasa, awe Aruba lo no ta pasa berguensa cu escandalo den gobierno
• Elton Lioe-A-Tjam (ABO): Kudos Ministerio Publico, pero ainda falta! 
• Dangui Oduber (MEP): Minister Paul Croes MESTER entrega su retiro!

Expresionnan haci den e articulo aki no necesariamente ta refleha opinion di ArenaPoliti.co