Perspectiva Independiente without background 001

Impacto di e conclusion di Raad van Advies tocante e KB [Update]

Report01Durante ultimo dianan, hopi a wordo papia di e ultimo rapport di Raad van Advies (RvA). Den e rapport, cual ta trata un presupuesto 2014 adapta, RvA tambe a investiga e legalidad di e Koninklijk Besluit (KB) cu e aanwijzing pa gobernador no firma presupuesto 2014 prome cu e wordo investiga. Manera ta pasa na hopi ocasion, partidonan politico ta selectivo den cua parti di e rapport nan ta duna atencion. Cu un analisis cortico, ArenaPoliti.co ta trata di trece mas claridad den e ultimo desaroyo aki.


Raad van Advies
Raad van Advies ta e organo consultativo mas halto di gobierno y parlamento. RvA ta un organo independiente y ta duna conseho riba leynan y gobernacion. Gobierno no ta obliga di sigui nan conseho. Por ehempel, RvA a considera entre otro presupuesto 2014 irrealistico, y regularmente a duna consehonan cu gobierno no a sigui. Den e caso actual, un di e conclucionnan di RvA ta cu e KB falta base legal, y cu gobernador mester firma e presupuesto.
E conclusion di RvA no ta duna confirmacion riba e legalidad di e KB. Tin aspectonan interpretativo riba cual huristanan ta diferencia di opinion. Gobierno di Reino probablemente lo tin argumentacionnan diferente. Pero esey no kiermen cu e conseho di RvA mester wordo poni un banda. RvA ta keda nos organo consultativo mas halto y a produci hopi rapport cu consehonan cu a resulta di ta corecto. 

KB
Mientras cu e enfoke di AVP riba e ultimo conclucion di RvA ta mustra di ta hopi selectivo, ta keda importante pa duna e punto aki atencion. No lo ta corecto pa otro partidonan ignora e conclusion aki di RvA tampoco. Como pais autonomo den Reino, Aruba no mester acepta un trato inhusto di Hulanda. Ignorando e posibel illegalidad di e KB por tin consequencianan negativo den futuro pa nos autonomia.
Di parti di partidonan den oposicion, paden y pafo di parlamento, por a nota cu e conclusion di RvA tocante e KB no ta wordo ignora, pero partidonan ta di opinion cu AVP ta desviando atencion for di nan propio ‘fayonan’ den e maneho financiero di nos pais. 

CFT
E investigacion di CFT ta un topico delicado y hopi importante. Di un banda e investigacion a confirma varios sospecho y a duna pueblo mas claridad riba Aruba su situacion financiero. Di otro banda CFT su presencia por afecta e autonomia di Aruba. Segun RvA, e investigacion di CFT tin su base den acuerdonan cu Gabinete Mike Eman I y II a sera cu Hulanda. E illegalidad eventual di e KB no ta afecta CFT.
AVP su punto di bista ta cu tin un diferencia di opinion riba interpretacion di acuerdonan haci entre Aruba y Hulanda. Den cualkier caso, cualkier gobierno di Aruba lo mester ta mas cauteloso cu acuerdonan cu ta afecta e autonomia cu Aruba mester a lucha pa obtene. 

Situacion Financiero
Cu of sin KB, e estado di nos situacion financiero ta keda e realidad cu nos ta biba cun’e. E conseho di Raad van Advies tocante e KB no lo cambia nos situacion financiero actual. Varios conseho di RvA cu si por a cambia nos situacion financiero actual, ta den pasado y no a wordo duna e mesun atencion cu nan conclusion tocante e KB.
Tempo lo mustra si Raad van Advies a yega na conclusionnan corecto den e caso di e KB tambe. 

Rapport: RvA Rapport OLV tot wijziging van Begroting 2014

Comunicadonan cu ArenaPoliti.co a ricibi riba e topico aki:
MEP: Discusion riba legalidad di KB no ta afecta e realidad di CFT
UPP: Fomenta polarisacion politico lo yuda desvia atencion for di e problema real na Aruba
MEP: Sr. Baba Herde a kibra regla di etica y fatsoen
Booshi Wever (UPP): E rapport di CFT a confirma e resultado di Raad van Advies cu e presupuesto 2014 tabata deficiente y ficticio

*Update 4 november 2014
Minister Ronald Plasterk, encarga cu asuntonan di Reino, a contesta algun pregunta tocante e legalidad di e KB. Minister Plasterk no ta comparti e opinion di Raad van Advies di Aruba, y ta considera e KB legal.
Carta: Antwoord op vragen van het lid Bosman over het bericht ‘Staatsraden oneens met aanwijzing’

Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.