Despues di 1 siman di tratamento, awe marduga Parlamento a aproba presupuesto 2015. E presupuesto a conta cu sosten di 12 parlamentario di fraccion AVP, mientras cu fraccion MEP, Andin Bikker (PDR) y Marisol Lopez-Tromp (AVP) a vota contra.
Diferente parlamentario y ministernan a ‘perde’ hopi tempo papiando di temanan no al caso. Insultonan, acusacionnan y discusionnan irelevante a desvia atencion for di tratamento di e presupuesto di e aña aki. Manera ta usual caba, parlamentarionan y ministernan tawata papia/stroba ora un persona ta hibando palabra. Parti di e publico presenta tambe tawata papia/grita durante diferente discursonan. Tur esaki tawata motibo pa presidente di parlamento suspende e reunion na varios ocasion.

E diferente fraccionnan a produci un total di 21 mocion for di cua 18 a bin di fraccion AVP, 2 di Andin Bikker (PDR) y 1 di fraccion MEP. Parlamento a aproba 19 di e mocionnan, mientras cu 1 di PDR y esun di MEP a keda rechasa.
Fraccion AVP tambe a entrega 2 amienda. E prome amienda ta trata e introduccion di un ombudsman y kinderombudsman. Tur fraccion a traha riba e amienda aki y ela keda aproba unanimamente.

3,5% BBO+BAZV
E di dos amienda ta trata un aumento di 1% di BAZV (Health Tax), y un reduccion di 1% di prima di AZV pa trahado. E cambio di e porcentahenan lo mester bay na vigor 1 juli 2015.
Ta inusual cu un fraccion ta entrega un amienda cu ta contene un aumento di porcentahe di un medida. E amienda ta crea e imprecion cu parlamentarionan di AVP a entrega e amienda pa asina Gobierno haya mas entrada, sin cu Gabinete Mike Eman II ‘wordo culpa’ pa e aumento. Parlamentarionan di AVP a defende nan amienda argumentando cu ta un decision responsabel. Oposicion tawata critico y ta considera e amienda como kiezersbedrog pa motibo cu AVP a campaña primintiendo di elimina e BBO di 3%, mientras cu e amienda lo mester resulta den un total di 3,5% na BBO+BAZV.

Tweede toetsing
Prome cu a bay pa votacion, lider di fraccion MEP Evelyn Wever-Croes a pidi pa laga Raad van Advies haci un tweede toetsing di e presupuesto, y en particularmente pa toets e di dos amienda di AVP. Esaki tambe en coneccion cu loke a pasa na 2014, ora gobernador no a firma presupuesto despues cu ela wordo aproba den Parlamento.
Lider di fraccion AVP Rene Herdé a expresa di ta contra di e peticion, mientras cu sr. Bikker (PDR) a sostene e peticion. Presidente di Parlamento Marisol Lopez-Tromp, cu a expresa cu e tambe ta desea un tweede toetsing, kier a laga parlamentarionan vota riba e peticion individualmente. Sr. Herdé a bisa cu fraccion AVP no ta sostene e peticion (cu excepcion di sra. Lopez-Tromp), y tambe a surgi un discusion si ta segun reglamento di Parlamento pa vota individualmente riba un peticion. E discusion a tuma basta tempo. Parlamentarionan di AVP a keda insisti pa no bin un votamento individual, mientras cu oposicion y sra. Lopez-Tromp tawata kier pa e wordo dicidi a base di voto indivildual. Na final di e discusion e decision a wordo tuma a base di e posicion tuma door di fraccion AVP, y no a laga Raad van Advies haci un tweede toetsing.

Marisol Lopez-Tromp
E discusion tocante un tweede toetsing no tawata e unico diferencia di opinion entre sra. Lopez-Tromp y e resto di e parlamentarionan cu ta sostene Gobierno. Sra. Lopez-Tromp a vota na fabor di un mocion di sr. Bikker, mientras cu e resto di fraccion AVP a vota contra. E mocion ta expresa cu Gabinete Mike Eman a falta respet na Parlamento en coneccion cu e protocol di 2 mei 2015. Sra. Lopez-Tromp tambe a vota contra e ley di presupuesto 2015. Durante un reunion tocante enseñansa algun siman pasa presidente di Parlamento tambe a vota diferente cu e resto di e fraccion. E ta refleha un posicion independiente, cu cada parlamentario semper tin derecho di tuma. Custumber ta cu fraccionnan ta vota en bloc. Sra. Lopez-Tromp su votonan ta indica cu e no ta di acuerdo cu sierto decisionnan di Gabinete Mike Eman II, y no ta riba mesun liña cu su fraccion (riba sierto punto). Di otro banda, sra. Lopez-Tromp ainda ta sostene Gabinete Mike Eman II como parlamentario y miembro di fraccion AVP.

E votonan di sra. Lopez-Tromp cu a desvia di e resto di su fraccion no a cambia e resultadonan di e votacionnan, pa motibo cu e otro 12 parlamentarionan di AVP si a vota en bloc y asina sigura un mayoria.

Expresionnan haci den e articulo aki no necesariamente ta refleha opinion di ArenaPoliti.co