Perspectiva Independiente without background 001

Booshi Wever (UPP): Cu declaracion di Marisol Lopez Tromp encuanto di Ocean Z, of Benny Sevinger ta retira, of Marisol Lopez Tromp mester retira su sosten na Benny Sevinger

Booshi02
Mientras cu henter pueblo ainda tabata den e sfera di habrimento di aña y tabata deseando otro bon aña, 2016 ta habri Aruba den un turbulencia politico y gubernamental basta mas bruha y mas grandi cu a sera 2015.
Apesar cu na final di 2015 nos di UPP a desea nos pueblo un bon aña, nos a avisa nos pueblo cu 2016 lo bira un aña pisa pa nos pueblo. Pero mas liher cu nos a kere e desaroyonan politico for di den seno di gobierno y partido AVP ta mustra un turbulencia politico completo y cu ta wordo marca pa yen di intraga, artimania y escandalonan sin igual.
 
Un di e tantisimo escandolonan sigur ta esun di e proyecto Ocean Z na Malmok, unda a yega asina leu cu propio colega partido di e minister di Infrastructura Benny Sevinger, ta mande huez pa asina obliga e y gobierno cumpli cu leynan, particularmente esun di e Ordenanza Teritorial. Segun Marisol Lopez Tromp, colega di Benny Sevinger, ta bisa cu ora bo intentonan y esfuerzonan agota pa mustra gobierno y minister cu su accionnan no ta bon, ta ilegal y contra interes general, bo mester acudi na Huez, pa asina busca bo derecho.
Cu e declaracion aki, sigur sosteni pa e dos sentencianan di Huez den e caso aki, y actonan contradictorio na principionan di Bon Gobernacion (Good Governance), si a resta minister Sevinger ainda honor, anto e mester a tuma su retiro como minister caba.
Pero tur cos ta mustra contrario, sigur si nos mira e splicacion pober cu e minister a duna prome cu e sentencia di dia 13 di januari ultimo.
Di otro banda UPP ta kere, cu e principionan di Bon Gobernacion, cu Presidente di Parlamento Marisol Lopez Tromp a acentua den su declaracion riba e sentencia aki, ta exigi pa e parlamentario mester mustra caracter y retira su sosten na e minister di Infrastructura, ya cu no ta mira accion di banda di minister Sevinger. Pero nos di UPP tin miedo cu e declaracion di “cu ora cu bo medionan agota, bo mester tuma e caminda di Huez”, ta muestra cu e Presidente di Parlamento aki, lo no mara ningun concecuencia na actonan di Mal Gobernacion di Benny Sevinger. Esaki ta haci tambe cu no solamente e posicion di Presidente di Parlamento, sino di Parlamento completo y e supuesto independencia cu miembronan di Parlamento ta boga pe, ta bira un hilaridad, pa no bisa un desprestigio completo.
Cu un declaracion asina di Marisol Lopez Tromp, nos ta kere cu ta imposibel pa su persona como Parlamentario aproba e presupuesto aki algun dia, ya cu asina e aproba e maneho descabeya y casi por bisa corupto di Benny Sevinger. 
 
Di otro banda UPP ta contento cu e sentencia aki, ya cu esaki ta habri caminda pa e ciudadanonan cu ta bringa pa e.o. conserva Urirama. Si proyecto ta wanta awor aki, ta pasobra e prijs di petroli ta casi na suela, e sentencia aki sigur y hunto cu ne e declaracion di Marisol Lopez Tromp, ta haci cu e proyecto di molinanan di biento no por bay dor. A menos cu minister, departamentonan y Gobierno completo, no ta respeta ni cumpli cu ley, manera esun di e Ordenanza Teritorial.
 
UPP mas y mas ta convenci cu BON GOBERNACION dia pa dia ta bira mas fundamental pa sobrevivencia di nos pais y nos pueblo. E sistema di gobernacion di ultimo 30 aña aki, aña cu nos ta celebra 30 aña di Status Aparte, dia pa dia ta mustra di ta uno mas deficiente, danki na un sistema parlamentario cu tampoco no ta sirbi mas. UPP ya caba na 2013 a bin cu proposicionnan concreto cu den e dianan aki, mirando e situacion politico y gubernamental actual nos lo bay na amplia riba nan.
 
 
Lider di UPP
C.A.S.D. Wever
15 januari 2016

Expresionnan haci den e articulo aki no necesariamente ta refleha opinion di ArenaPoliti.co

x

 

Inscribi pa ricibi un resumen semanal di e articulonan mas impactante.