ORANJESTAD – Ayera den oranan di atardi e di tres streetcar of tram, cu lo bay wordo opera door di AruTram, bou di Arubus, a yega su sede na Playa. E tram cora ta e di dos double-decker y ta bay forma parti di un trio di vehiculonan cu ta bay percura pa un fluho constante di bishitantenan por bishita centro di ciudad di Oranjestad.

Despues cu el a yega Aruba na inicio di e siman aki, el a wordo transporta diahuebs den oranan di atardi pa Oranjestad, unda e ta keda den e 'remise' pa asina prepare pa drenta den funccion y wordo inspecciona pa segura cu tur cos ta na ordo.

E tram aki ta forma parti di un flota di tres cu ta cay bou maneho di Arubus y cual a wordo incorpora den e plan di Gabinete Mike Eman I y II pa revilitasa centro di Oranjestad. E tram cu a yega awo,  mescos cu e otronan, ta realisa biahenan for di dilanti di waf di Oranjestad te final di Caya Grandi, dilanti di Plaza Nicky Habibe. E intencion ta cu ta hiba clientenan, particularmente turistanan di barconan crucero pa e parti mas pariba di e centro pa asina nan por bishita e pacusnan.

E tram cu a yega Aruba awor ta di color cora y tin escudo di Aruba graba na e parti na banda. E proyecto di tram ta conta cu cuater streetcar, di cual un ta fungi como reserva. Actualmente, ya a transporta un total di mas di 350 mil pasahero, e mayoria turistanan crucero, y e vehiculo nobo ta yega pa alivia e demanda y baha e cantidad di tempo cu usuarionan ta warda entre un tram y e otro. E streetcar aki ta forma parti di e plan manera a keda presenta originalmente, esey kiermen cu e no ta un compra adicional, ni tampoco ta representa gastonan extra pa caha di Gobierno di Aruba.

Expresionnan haci den e articulo aki no necesariamente ta refleha opinion di ArenaPoliti.co