Na juli 2014 nos por a tende varios Minister di Gabinete Eman hiba un lucha contra e KB y e investigacion di CFT riba e presupuesto 2014 di nos Pais. Nos Minister Eman a bay den un welga di hamber expresando palabranan duro contra nos Gobernador y contra Hulanda y den e proceso a expresa cu over “my dead body” CFT lo investiga su gobernacion y hasta a manda carta pa tur ambtenaar pa no coopera y boycotea e investigacion di CFT. Despues di tur e lucha y welga aki contra CFT, awor diripiente ta bin e noticia cu Gabinete Eman mes a pidi CFT pa investiga presupuesto 2015 pa nan. E manera di actua aki ta haci e Gobierno di Gabinete Eman uno bi-polar ya cu un rato nan ta welga contra investigacion di CFT pa despues nan mes bira pidi CFT pa investiga nan.

Interesante awor ta pa sa ta den ki forma CFT lo opera na Aruba ya cu sr Bakker di CFT den su carta fecha 2 december 2014 a indica cu CFT no por traha sin base legal na Aruba. E investigacion cu CFT a haci riba presupuesto 2014 tabata basa riba e KB di 11 juli 2014 y awor cu e investigacion ey a keda cla, e KB aki su efecto ta termina y CFT no tin base legal pa por sigi cu presupuesto 2015. Gobierno den su comunicadonan a laga sa cu pa investiga presupuesto 2015 no mester di ningun KB, pero locual nan no ta bisa ta cu pa CFT por traha pa Aruba sea mester bin un Ley di Reino (Rijkswet) of un Algemene Maatregel van Rijksbestuur pa haci esaki posibel. Di e manera aki Aruba ta entrega su autonomia financiero pa otro dicidi riba dje, ya cu e conseho di CFT no por ser poni un banda y Gobierno di Aruba mester cumpli cune. Ta un Gobierno bi-polar so ta bisa na juli 2014 cu e ta lucha pa conserva nos autonomia y ta dispuesto pa bay te Nacionnan Uni pa hiba e lucha aki, anto na december 2014 ta bisa cu e ta di acuerdo pa entrega su autonomia financiero sin KB.

Mas importante ta pa nos haya sa ta kiko Minister Eman a deal na beneficio di e Pueblo di Aruba, ya cu otro Paisnan den Reino cu a bay de acuerdo cu e Ley di Reino pa haci e supervicion financiero di CFT posibel, a haya placa pa paga parti di nan debe y ademas ta haya placa fia na interes reduci for di Hulanda. Pasobra lo ta hopi tristo cu Aruba mester bay di acuerdo cu supervicion financiero djies pasobra cu Gabinete Eman no por maneha nos finanzas publico na un manera adecuado y e temor cu nan lo haci un desastre mas grandi ta pone cu nan mester bay bou curatela. Ta ora bo tin un Gobierno bi-polar bo ta haya e tipo di problema nan aki na unda cu e Gobierno mes ta e problema di e Pais y pa proteha e Pais di su mesun Gobierno mester pone bou curatela di CFT.

Por ultimo mester bisa cu ta bisto cu esaki ta e resultado di e firma di Gabinete Eman bou di e Protocol di Cooperacion cu Donner na 2011, e Acuerdo di Diahuebs Santo na 2013 y e carta di ‘geen bezwaar’ di februari 2014. For di e acuerdonan aki a bira bisto cu nunca Gabinete Eman a sali na vanguardia di Aruba su interesnan, pero mas bien a busca manera pa entrega e autonomia di Aruba a cambio di un saco di placa pa asina por keda semper na poder. Ta un Gobierno bi-polar so ta firma pa entrega autonomia di su Pais pa despues hiba un lucha pa conserva e mesun autonomia cu ela entrega.

11 december 2014

Expresionnan haci den e articulo aki no necesariamente ta refleha opinion di ArenaPoliti.co