E ta obvio y bisto caba cu despues di dia 22 september 2017 Aruba lo conoce un gobierno nobo. Un gobierno di politiconan drechi, politiconan responsabel cu un un integridad intachabel. Deespues di 8 anja di desaster di e gobierno di AVP nos pais mester un gobierno cu lo percura pa progreso di e ser humano. Nos hendenan a ser lubida e ultimo 8 anjanan. E hende no a progresa despues di 2 gobernacion di AVP. E hende su situacion financiero no a bira mihor, fin di luna e no ta keda cu mas placa den su cartera, su poder di compra no a bira mihor, e costo di bida ta mas halto cu nunca. Ningun di e problemanan aki e gobierno aki a atende cune.

MEP tin un plan concreto con nos ta stimula economia, crea empleo y tambe mehora e poder di compra y alivia e peso riba cada famia. MEP kier pa e ser humano progresa despues di nos gobernacion. Ki bal hinka 1 biyon florin den infrastrcutura y mayoria hende riba bo pais ta biba di salario pa salario. Nos pais ta den un recession economico hopi serio y no tin perspectiva cu e situacion lo mehora.

Na momento un gobierno asumi responsabilidad su prioridad ta progreso di e ser humano y logicamente progreso di e pais. Esakinan mester bai man den man cu otro. Lamentablemente e gobernacion di AVP a lubida cu e ser humano ta existi. E la lubida cu e ser humano su placa no ta alcansa pa hiba un bida digno na Aruba. Prioridad manera cu MEP drenta gobierno ta pa crea cuponan di trabou pa nos hobenan. No por ta asina cu 1 di cada 3 hoben actualmente ta sin trabou. Nos ta kita e interes di e prestamo di estudio tambe riba tur studiante cu ta haci prestamo pa estudio manera cu e ta na Hulanda. Fianza di estudio lo mester bira rente vrij. Nos hobenan mester haya e oportunidad pa crea un futuro riba propio pais. Mester haci mas uso di innovacion y technologianan pa crea oportunidadnan nobo pa nos hobenan.

Nos a bisa cu nos lo mehora e poder di compra door di aumenta e canasta basico pa asina eherce un mihor control di prijs riba productonan y prijs maximo. Tin hopi abuso tumando lugar cu prijsnan y AVP no a haci nada pa aumenta e canasta basico. E ta importante pa haci esaki pa alivia e peso riba famianan den necesidad.

Un cambio ta inevitabel. Bo ta sinti e biento di cambio y e pueblo aki a cansa si corrupcionan, cansa di hendenan cu no ta integro, nan a cansa di tanto ganjamento y cansa di un gobierno cu NO ta cumpli cu loke a priminti. Si den 8 anja Mike Eman NO por a cumpli cu su promesanan con e ta bai cumpli e proximo 4 anjanan. Si den 8 anjanan Mike Eman NO por a wanta su partido hunto con e ta bai pidi pueblo 4 anja mas.

Dia 22 september 2017, Vota MEP y Vota Dangui Oduber pa cambionan progresivo.

Expresionnan haci den e articulo aki no necesariamente ta refleha opinion di ArenaPoliti.co