Chris Dammers (AVP) durante reunion di hedging ainda tabata tin e pudor di culpa Nel Oduber pa e escandalo di hedging, siendo cu den tempo cu Nel Oduber tabata minister presidente di nos pais, e hedging tabata solamente beneficioso pa WEB.
Pero e hedging desde e gobierno di AVP pa poniendo WEB perde 7 miyon florin tur luna. Cu e contractnan di hedging cu tin awor lo costa pueblo di Aruba 180 miyon florin.
Talves e argumento mas ridiculo cu a resalta den e reunion tabata na momento cu Chris Dammers a tilda Nel Oduber di ta culpabel pa esaki, pasobra e compania cu a aconseha WEB na anja 2002 y cu Nel a firma contract cun’e, Kase & Co. awe ainda ta conseha WEB, y Dammers kier culpa Nel di a trese e compania ey aden.
Pero Dammers ta lubida cu Kase & Co. ta duna CONSEHO y ta WEB ta dicidi si nan ta sigi e conseho of no! No ta Nel Oduber ta dicidi. Nel tin 5 anja cu el’a retira di politica, e ta dedica su tempo na su nietonan y su cunucu, anto ainda nan kier culpa Nel di hedging? Acaso ta pinda Nel ta hedge?

Esey tabata motibo pa lider di MEP Evelyn Wever-Croes exigi di Mike de Meza pa pone e supuesto contract ey cu Nel a firma, pasobra ta mustra awor cu AVP kier culpa Nel di e escandalo di WEB y pa Wever-Croes esey ta un acto di cobardia di parti di AVP y totalmente inaceptable. Pero Mike de Meza a pone Chris Dammers su cara na berguensa, na momento cu de Meza a bisa cu NO tin un contract manera Dammers ta referi na dje, mustrando asina con GANJADO Chris Dammers ta.

Expresionnan haci den e articulo aki no necesariamente ta refleha opinion di ArenaPoliti.co