Perspectiva Independiente without background 001

Parlamento lo tuma decision historico pa cu Aruba su autonomia

Parlamentario 2013
Diahuebs awo (27 augustus) Parlamento di Aruba lo trata e ley di College Aruba financieel toezicht (CAft). E ley ta regla supervicion financiero riba Aruba su finansas, y ta nifica perdida di parti di e autonomia cu Aruba a logra na 1986 cu nos Status Aparte. Gabinete Mike Eman a firma diferente protocol y yega na acuerdonan cu gobierno Hulandes, cu a resulta den e ley di CAft. Awo nos organo di mas halto, cu ta Parlamento, tin cu aproba of rechasa e ley aki.

CAft = Cft?
Aña pasa prome minister Mike Eman a bay den un welga di hamber y a bisa di no lo entrega ni un milimeter di Aruba su autonomia, y cu Aruba no lo acepta Cft. Sr. Eman a bisa cu e ta dispuesto pa muri pa esaki. Sinembargo, asina mes sr. Eman a firma e protocol di 2 mei 2015, habriendo caminda pa CAft.
E diferencia entre Cft y CAft ta poco y ta mustra di ta algo ‘cosmetico’. Mientras cu Hulanda ta nombra e miembronan di Cft, den e caso di CAft, Aruba por nombra un (1) di e tres miembronan. E otro dos miembronan ta wordo nombra door Hulanda, y Gobierno di reino. Gobierno di reino ta consisti di e gobierno Hulandes completo, y e tres ministernan plenipotenciario di Aruba, Corsou y Sint Maarten. Pues Hulanda facilmente por dicidi kico Gobierno di reino ta haci, y defacto Gobierno di reino ta Gobierno Hulandes. Pues Hulanda ta eligi dos di e tres miembronan di CAft, incluso e presidente di CAft. E presidente di CAft lo ta sr. Bakker, cu tambe ta presidente di Cft. Ademas a sali na cla cu Cft mes lo haci hopi di e trabou supervisor.
Si e ley wordo aproba, Aruba lo ta bou di supervicion di CAft te ora cu Aruba logra yega na un balanced budget duradero (duurzaam begrotingsevenwicht), pa despues, den cooperacion cu Hulanda, institui un fiscal council pa tuma over e trabou di supervicion.

Aanwijzing
Si e ley wordo aproba door di Parlamento, CAft lo raporta na minister di finansas, ministerraad, Parlamento, y Gobierno di reino (Hulanda). E ley ta obliga Gobierno di Aruba pa cumpli cu rekisitonan cu ta yuda CAft controla e finansas di Aruba. E ley tambe ta stipula normanan financiero cu Gobierno di Aruba lo mester cumpli cune. Den varios articulo tin poni cu CAft por recomenda Gobierno di reino (Hulanda) pa duna Aruba un aanwijzing (KB), y tambe cu Hulanda por duna aanwijzing. Esaki ta mustra e esencia di CAft; un instrumento pa Hulanda controla Aruba su finansas, y si Hulanda kier, interveni y tuma decisionnan pa Aruba. Un limitacion substancial riba nos autonomia financiero, bayendo bek den direccion prome cu nos Status Aparte.

E ley no t'ey por nada
Den Pueblo tin discusionnan andando si e ley lo resulta den mas medida, bou presion di Hulanda. Na diferente ocasion miembronan di AVP a expresa cu esey no lo ta e caso y cu Gabinete Mike Eman mes a y ta dicidi ki medidanan ta wordo implementa. Di otro banda, ya caba por a wak con presion di Hulanda a resulta den entre otro BAZV, y despues un aumento di BAZV. Y esey tawata sin supervicion financiero. Cu e ley aki, e presion ta wordo formalisa den articulonan cu ta mustra consecuencia den e caso cu Aruba no cumpli cu rekisito- y normanan stipula. Aruba mes por bin cu cualkier norma cu Aruba kier, tanten cu Hulanda ta aproba. Sino → aanwijzing. Hulanda ta dicidi, y CAft ta e instrumento pa haci esaki posibel.
Mientras cu hopi Arubiano no kier wak Aruba perde su autonomia financiero, tambe tin esnan cu tin confiansa den Hulanda pa tuma decisionnan pa cu Aruba su finansas, incluso cortamento di gasto y medida, y ta considera e perdida di autonomia algo bon, argumentando cu e control for di Hulanda lo haci Gabinete Mike Eman II goberna miho.
E confiansa den Gobierno Hulandes no ta un sentimento cu henter Pueblo di Aruba ta comparti, entre otro pa motibo di e rol cuestionabel cu Gobierno Hulandes a hunga den loke ta trata intervencion y negosacionnan cu Gabinete Mike Eman I y II.

Pueblo tin algo di bisa?
E perdida di autonomia financiero te ainda a wordo regla sin cu Pueblo tawata tin algo di bisa. No tawata tin un referendum, y den e ultimo eleccion Pueblo no a duna un partido e mandato pa entrega parti di nos autonomia na Hulanda.
E negosacionnan a tuma luga entre Gabinete Mike Eman y Gobierno Hulandes. Lo tin consecuencianan pa Pueblo di Aruba, mientras cu e Pueblo di Aruba no lo por eligi ni afecta esnan cu ta haya control riba Aruba su finansas (Gobierno Hulandes). Loke Pueblo si tin pa via di nos sistema constitucional, ta e organo di mas halto, e Parlamento di Aruba. Representantenan di Pueblo, eligi door di Pueblo pa defende e interes y bienestar di Pueblo, y controla Gobierno.
E 21 parlamentarionan riba e imagen ariba ta esnan cu ta representa Pueblo, y cu ta aproba of rechasa leynan den nomber di Pueblo. E voto di 11 of mas parlamentario lo ta decisivo pa si e ley lo wordo aproba of rechasa.

Tanto AVP como partidonan den oposicion a reclama e intervencion di Hulanda, a categorisa esaki como colonial, y a bisa di lo defende nos autonomia. Durante tratamento di e ley di CAft cada parlamentario lo tin e oportunidad pa para pa loke e ta kere aden, sali na defensa di Pueblo, y tuma un decision honesto, na bienestar di pais Aruba.


Klik aki pa lesa/download e ley di CAft , memorie van toelichting, conseho di Raad van Advies y mas documeto relaciona cu CAft.
Klik aki pa lesa/download e protocolnan relevante cu Gabinete Mike Eman I y II a firma cu Hulanda.
Pa mas informacion, klik pa lesa: 'Aruba mester ta contento cu CAft?' y 'Expectativanan pa e reunion historico tocante ley di supervicion'.



Expresionnan haci den e articulo aki no necesariamente ta refleha opinion di ArenaPoliti.co

7 motibo pa laga Pueblo eligi su Gabinete

Columna Asiento 22 | S01E05 Hopi ciudadano ta na fabor di un cambio den nos sistema democratico cu lo duna Pueblo e poder pa eligi Parlamento y un (minister-)presidente den eleccionnan separa. De...

Sigui lesa...

Inscribi pa ricibi un resumen semanal di e articulonan mas impactante.

 

Contacto

ArenaPoliti.co ta un website di BPS Media

 

Pa tuma contacto of pa manda comunicado:

[email protected]

 

Advertising:

[email protected]

x

 

Inscribi pa ricibi un resumen semanal di e articulonan mas impactante.