Diamars merdia a tuma luga un vragenuur den Parlamento, den cual minister Otmar Oduber tawata presente pa contesta preguntanan relaciona cu ATA. E vragenuur a wordo pidi door di lider di fraccion di AVP Rene Herdé, y a ensera 5 pregunta tocante actividadnan di mercadeo di ATA y e destaho relaciona cu e logo di Aruba. Por lesa e peticion y preguntanan na final di e articulo aki.

Segun parlamentario Xiomara Maduro (MEP), minister Oduber tawata tin e intencion pa contesta e 25 pregunta cu MEP a haci por escrito dia 30 di maart, durante e vragenuur, mientras cu MEP a pidi pa ricibi e contestanan por escrito.
Sra. Maduro ta referi na nos constitucion, splicando cu e minister mester contesta por escrito y no por 'scapa' di esaki door di e vragenuur.

Parlamentario Xiomara Maduro elaborando riba e vragenuur:

Segun Xiomara Maduro, prome minister Mike Eman lo ta tras di e iniciativa di e vragenuur, y e meta mas bien ta pa purba trece paz den e ‘guera’ entre sr. Otmar Oduber y sr. Nelson ‘Speed’ Andrade, pa asina purba pone un paro na informacion cu esnan rond di minister Oduber ta divulgando di sr. Eman.

Un otro punto cu sra. Maduro ta menciona ta cu minister Oduber no a contesta tur pregunta cu a wordo puntra durante e vragenuur, particularmente cuanto placa di pueblo (fondo publico) a wordo paga na compania di un amigo di e minister.

ArenaPoliti.co lo keda pendiente pa publica e contestanan por escrito di sr. Oduber riba e 25 preguntanan di Fraccion di MEP. Mester remarca cu parlamentarionan di MEP tambe a acudi na Ministerio Publico relaciona cu e asunto di logo di Aruba y mas destahonan cu a tuma luga, y ta di opinion cu minister Otmar Oduber mester wordo investiga.

Peticion di parlamentario Rene Herdé pa un vragenuur, y e 5 preguntanan:

Expresionnan haci den e articulo aki no necesariamente ta refleha opinion di ArenaPoliti.co