Despues cu e documentonan relaciona cu e acuerdonan entre Gobierno y Citgo y entre Gobierno y Valero a yega Parlamento e siman aki, diferente parlamentario no a keda contento cu e circumstancianan bou di cual nan mester trata e acuerdonan pa un reapertura di nos ‘refineria’.

Na juni 2016 Gabinete Mike Eman a laga sa cu e contract cu Citgo ta uno compleho. Pa ilustra e embergadura, Gabinete Mike Eman a haci un comparacion entre e contract di reapertura cu Coastal na aña 1989, cual segun Gabinete Mike Eman tawata uno di 30 pagina, mientras cu e acuerdo cu Citgo ta ensera documentonan cu hunto ta riba 2000 pagina.

Awo Parlamento mester prepara pa trata e contractnan y cumpli cu nan tarea di controla Gobierno. A pesar di e embergadura y complehidad di e contractnan, Parlamento ta haya e documentonan solamente ter inzage y ta haya algun dia di tempo pa wak nan den biblioteca di Parlamento, bou supervicion di dos coordinador di Gabinete Mike Eman. Tratamento den un reunion publico ta plania pa dialuna 26 di september 2016, mientras cu tin un ‘deadline’ pa e reapertura cual ta 1 di oktober 2016. 

Confidencial 
Minister Mike de Meza a splica cu pa motibo di confidencialidad di e acuerdonan e parlamentarionan no por haya copia di e documentonan. Pues nos organo di mas halto no ta wordo confia pa haya e documentonan. Oposicion a remarca cu Raad van Advies si a haya e documentonan, y tambe ta cuestiona si e confidencialidad ta conta pa tur e documentonan. Banda di e aspecto di confidencialidad, hopi ta keda cuestiona cu un mayoria den Parlamento ta acepta pa por wak e documentonan compleho di riba 2000 pagina pa apenas algun dia, pa motibo cu ta e siman aki Parlamento a ricibi e documentonan y e reunion ta plania pa e siguiente dialuna caba, mientras cu mester traha cu un proceso ‘ter inzage’. Con parlamentarionan por sigura e Pueblo cu nan ta representa cu nan ta cumpli cu nan trabou di controla Gobierno den un forma responsabel bou di circumstancianan asina? Ta trata di contractnan cu ta mara pais Aruba pa por lo menos un decada. 

Parlamentarionan di MEP studiando e acuerdonan bou supervicion di dos coordinador di Gabinete Mike Eman II. 

E mayoria ta dicidi 
Actualmente AVP tin un mayoria di 12 asiento den Parlamento, mientras cu oposicion tin 9 asiento (MEP 7, PDR 1, y parlamentario independiente Lopez-Tromp). Considerando cu mayoria decision den Parlamento ta wordo tuma por medio di un mayoria, oposicion no por determina e rumbo cu Parlamento ta tuma sin sosten di (parti di) Fraccion AVP. Fraccion AVP cu su mayoria tin e poder pa realisa un proceso di prepapracion mas responsabel pa trata e ley. Mescos cu Fraccion AVP por percura pa no tin quorum pa trata un ley, Fraccion AVP por percura pa circumstacianan mas adecua pa Parlamento haci nan trabou. Presidente di Parlamento Wyatt-Ras (AVP) tambe por hunga un rol clave den percura pa circumstancianan mas adecua. ArenaPoliti.co a manda algun pregunta pa sra. Wyatt-Ras (20 sept.), incluyendo si e ta considera e proceso en cuestion uno responsabel. Te ainda ArenaPoliti.co no a ricibi contesta di sra. Wyatt-Ras.

Lider di Fraccion AVP sr. Rene Herdé den un comunicado di prensa ta defende e aspecto di confidencialidad y e proceso ‘ter inzage’ pa studia e acuerdonan.

Oposicion
Mientras cu oposicion ta reclama, AVP tin un mayoria cu ta permiti nan pa trata e acuerdo manera nan ta haya aceptabel. Dia 21 september 2016 lidernan den oposicion sra. Wever-Croes (MEP), sr. Bikker (PDR) y sra. Lopez-Tromp (independiente) a reuni cu Gobernador interino sra. Ella Tromp-Yarzagaray pa expresa nan preocupacionnan relaciona cu tratamento di e acuerdonan. Anteriormente sra. Wever-Croes a manda un carta pa presidente di Parlamento sra. Wyatt-Ras, pidiendo pa reconsidera e proceso “intransparente y iresponsabel” pa trata e acuerdonan. Sinembargo, tanten cu Fraccion AVP den su totalidad insisti riba e forma di proceder, no lo ta facil pa esnan den oposicion trece un cambio den esaki.

Speculacion
E forma cu Parlamento ta wordo limita den su abilidad pa controla Gobierno por crea e imprecion cu e acuerdo no ta mesun bon pa Aruba cu Gabinete Mike Eman ta propaganda. Tambe tin esnan (p.e. sr. Benny Nisbet) cu ta considera esaki un strategia politico di AVP como represaya contra miembronan di oposicion cu a bisa di a hunga un rol den logra un reapertura.
Parlamentario Glenbert Croes (MEP) ta sinti cu loke AVP ta haci ta un intento pa provoca un reaccion negativo di MEP pa asina MEP “bira lomba” pa e logro di un reapertura, cual segun sr. Croes MEP no lo haci.

Expresionnan haci den e articulo aki no necesariamente ta refleha opinion di ArenaPoliti.co