Siman pasa cu masha urgencia Presidente di Parlamento a yama un reunion publico di un dia pa otro pa trata e KB cu Hulanda a impone na Sint Maarten, siendo cu aki na Aruba mes ningun dia nos propio KB y rapport di CFT a keda trata publicamente pa Parlamento di Aruba. Di e manera aki Fraccion di AVP kier sende luz na caya pa otro cana y den nos cas mes, ta laga Pueblo wander den scur.

E ta conoci cu na momento cu Aruba a haya un KB y cu Minister Eman a bay den welga di hamber, e Fraccion di AVP a bay rumbo Sint Maarten pa pidi sosten pa condena e hecho aki. Awe cu Sint Maarten tambe a haya un KB nan a pidi Aruba pa para banda di nan tambe den e guerra cu nan a proclama contra Hulanda. Pa e motibo aki Presidente di Parlamento a core yama un reunion publico di un dia pa otro pa asina por pasa un mocion pa sostene Sint Maarten y condena locual Hulanda ta haci cu e Pais.

Cu tur respet pa nos rumannan di Sint Maarten, pero Parlamento di Aruba tin un compromiso cu e Pueblo di Aruba promer cu tur otro. Te ainda Parlamento di Aruba den un reunion publico no a debati riba nos propio KB y rapport di CFT. Te ainda e Pueblo di Aruba mes no sa kiko e contenido y e consecuencia ta di e KB y e rapport di CFT pa nos Pais. Den un situacion asina aki Parlamento no por permiti su mes e luho di trata KB di un otro Pais enves di esun di su propio Pais. Parlamento di Aruba tin e obligacion moral pa brinda e claridad aki na Pueblo di Aruba promer cu trata cualkier problema di un otro Pais.

Ta bisto cu Fraccion di AVP no tin e interes di e Pueblo di Aruba na pecho. Nan ta prefera di sende luz di caya pa otro cana, siendo cu den nos cas mes, nan ta laga Pueblo wander den scur.

8 november 2014

Expresionnan haci den e articulo aki no necesariamente ta refleha opinion di ArenaPoliti.co